Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k.
請安裝Taigi Unicode字形，配合Firefox瀏覽器來讀。
Í-se-kiat 40:1-2,5,19,47
1 Goán siū-lia̍h ê jī-cha̍p-gō͘ nî, tī nî-thâu, ge̍h ê chhoe-cha̍p ji̍t siâⁿ phòa liáu-āu tē cha̍p-sì nî, tú-tú hit-ji̍t Iâ-hô-hoa ê chhiú hē tī góa ê sin-chiūⁿ, chhōa góa kàu hia. 2 Tī Siōng-tè īⁿ-siōng-tiong tòa góa kàu Í-sek-lia̍t tōe, an-tì góa tī chin-koâiⁿ ê soaⁿ, soaⁿ-téng ê lâm-pêng ū chhin-chhiūⁿ khí-chō ê siâⁿ. …… 5 Khòaⁿ ah, chhù ê gōa-bīn sì-ûi ū chhiûⁿ, hit lâng ê chhiú the̍h chhek-liông ê ko-chhioh, tn̂g la̍k tiú, múi-tiú sī chi̍t-tiú koh chi̍t pa-chiúⁿ; i chiū niû chhiûⁿ kāu chi̍t ko-chhioh, koâiⁿ chi̍t ko-chhioh. …… 19 I tùi ē-bīn mn̂g ê thâu-chêng niû kàu lāi-īⁿ thâu-chêng ê gōa-bīn, khoah chi̍t-pah tiú; tang-bīn pak-bīn lóng sī án-ni. ……47 I koh niû hit ê īⁿ, tn̂g chi̍t-pah tiú, khoah chi̍t-pah tiú; sī sù-hong–ê; tôaⁿ sī tī chhù-chêng.
以西結書 40:1-2,5,19,47
1 阮受掠 ê 二十五年，tī 年頭，月 ê 初十日城破了後第十四年，tú-tú hit 日耶和華 ê 手 hē tī 我 ê 身上，chhōa 我到 hia。2 Tī 上帝異象中帶我到以色列地，安置我 tī 真高 ê 山，山頂 ê 南 pêng 有親像起造ê城。……5看 ah，厝ê外面四圍有牆，hit 人 ê 手 the̍h 測量 ê 篙尺，長六肘，每肘是一肘 koh 一巴掌；伊就量牆厚一篙尺，高一篙尺。……19 伊對下面門的頭前量到內院頭前的外面，闊一百肘，東面北面 lóng 是 án-ni。……47 伊 koh 量 hit-ê 院，長一百肘，闊一百肘；是四方 ê；壇是 tī 厝前。
Í-se-kiat ê Utopia sèng-tiān？
以西結 ê Utopia 聖殿？
Í-se-kiat tī Siōng-tè īⁿ-siōng tiong kìⁿ tio̍h ê chhù（sèng-tiān）sī tn̂g kap khoah lóng 100 kong-chhioh chiàⁿ-sù-hong, koh khí-chō tī sì-kho͘-liàn-tńg lóng-sī 250 kong-chhioh ê chiàⁿ sì-kak-hêng thó͘-tē tiong-ng（42:15）, iok-lio̍k kap Ko-hiông Kok-ka Thé-io̍k-tiûⁿ pún-thé ê chiàm-tē kâng-khoán.
以西結 tī上帝異象中見 tio̍h ê 厝（聖殿）是長 kap 闊 lóng 100公尺 ê 正四角形，koh 起造佇四箍輾轉 lóng-sī 250 公尺 ê 正四角形土地中央（42:15），約略 kap 高雄國家體育場本體 ê 占地仝款。
Lán thó͘-siūⁿ mā chai, chit-ê sin ê sèng-tiān bô-khó-lêng khí-chō tī khám-khám-khia̍t-khia̍t ê Iâ-lō͘-sat-léng kap Í-sek-lia̍t soaⁿ-tē, kám-kóng chè-si chhut-sin ê Í-se-kiat ē m̄-chai? Lán eng-kai kóng, Í-se-kiat chhim-chhim jīm-bat īⁿ-siōng ê pún-chit. Í-se-kiat kóng sin ê sèng-tiān sī khí-chō tī koân-soaⁿ téng-bīn, m̄-sī khí-chō tī Iâ-lō͘-sat-léng, in-ūi Iâ-lō͘-sat-léng sī chhiong-móa hiong-sat, pōe-ge̍k, ngó͘-siōng, ap-pek, pe̍h-chha̍t kap siâ-ok ê só͘-chāi. Sin ê sèng-tiān ū choan-sio̍k ê thó͘-tē, bē-sái hù-sio̍k tī kiaⁿ-siâⁿ.
咱土想 mā chai，這个新ê聖殿無可能起造 tī 坎坎坷坷ê耶路撒冷 kap 以色列山地，敢講祭司出身 ê 以西結會 m̄-chai（毋知）？咱應該講，以西結深深認捌異象ê本質。以西結講新ê聖殿會起造tī懸山頂面，m̄-sī 起造 tī 耶路撒冷，因為耶路撒冷是充滿凶殺，背逆，偶像，壓迫，白賊 kap 邪惡 ê 所在。新 ê 聖殿有專屬 ê 土地，袂使附屬 tī 京城。
Tī Iû-tāi-kok bia̍t-bông liáu-āu, Í-se-kiat kóng Í-sek-lia̍t chú-bîn ē tńg-khì kò͘-hiong, khí-chō chit-ê sin-ê sèng-tiān, Siōng-tè ê êng-kng ē chhiong-móa tiān-lāi, Í-sek-lia̍t ē chun Siōng-tè chòe tōa, ēng sèng-tiān chòe tiong-sim têng-sin hun-phài thó͘-tē hō͘ ta̍k chi-phài, têng-sin hun-phòe châi-sán kap chu-goân. Che m̄-sī Utopia. In-ūi beh hō͘ kok-ka kiâⁿ-tah tī Siōng-tè ê kong-gī kap chû-ài m̄-sī oân-choân bô khó-lêng. Kap hit-ê tī gîn-kak-á téng-bīn ìn “In God we trust” m̄-koh bô Choân-bîn kiān-pó ê kok-ka saⁿ-pí, Tâi-oân ê Choân-bîn kiān-pó chin-chiàⁿ sī sian-ti īⁿ-siōng ê si̍t-chiān. Sòa–lo̍h-lâi, lán kè-sio̍k phah-piàⁿ ê bo̍k-phiau sī sím-mi̍h?
Tī 猶太國滅亡了後，以西結講以色列住民會轉去故鄉，起造這个新ê聖殿，上帝ê榮光會充滿殿內，以色列會尊上帝作大，用聖殿作中心重新分派土地 hō͘ 逐支派，重新分配財產 kap 資源。這 m̄-sī Utopia。因為 beh hō͘ 國家行踏tī上帝ê公義 kap 慈愛 m̄-sī 完全無可能。Kap 彼个 tī 銀角仔頂面印「In God we trust」m̄-koh 無全民健保 ê 國家相比，台灣 ê 全民健保真正是先知異象 ê 實踐。紲落來，咱繼續打拚 ê 目標是啥物？
延伸閱讀：【少年新眼光台語版】
