【台文版復刊30週年紀事】
1885年巴克禮牧師用 PE̍H-ŌE-JĪ（白話字）發行台灣頭一份報紙《Tâi-oân Hú-siâⁿ Kàu-hōe-pò》（今《台灣教會公報》，簡稱《教會公報》）。1969年3月中國國民黨政府禁止白話字，1049 kap 1050期合併出刊，成做最後一期 ê 白話字報紙。Kāng 年12月，《教會公報》復刊，改用中華民國語發行，停止使用84冬 ê 白話字。經過22冬後 ， 1991年9月22日《教會公報》第2064期正式開設兩版〈台語特刊〉，用台語漢字 kap 白話字刊登文章。2002年，台文版由兩版縮作一版。算起來，台文版復刊到今，拄好滿30冬矣。本期 kap下期特別企畫專題，邀請歷年來佇台文版筆耕 ê 作家，分享 in ê 心情，mā 祝福台文版復刊30週年。未來 ê 路猶真長，向望讀者多多支持台文版，用母語寫作投稿《教會公報》，利益母語使用，落實台灣基督長老教會「認同所有的住民」ê 信仰告白。 （《台灣教會公報》台文版主編林碧堂）
◎李信仁
「Khah早，《台灣教會公報》是用台語白話字寫 ê 。」這是1984年我10歲 ê 時，阮阿公 kā 我講 ê 。
有一工，阿公托阿母 kā《教會公報》提 hō͘ 我，吩咐我 tio̍h 定定讀。對彼時開始，我成做《教會公報》ê 忠實讀者，阿公認為我小學三年級 ê「國語」程度應該讀有。我有一寡疑問：「阿公講台語、讀台語聖經，用台語寫作應該是真正常 ê 代誌，m̄-koh，欲按怎寫台語？以前用台語寫文章、印報紙，chit-má thài 寫袂出來？」Chia–ê 問題我無問阿公。
Hit-tang-chūn，我 tī 生活中不時接觸風格無仝 ê 台語，感覺台語是比華語 koh khah 有滋味 ê 語言。
Tī 放學 ê 路上，我經過 ê 錄影帶店就是三立影視 tī 高雄起家 ê 所在，店內傳來豬哥亮 ê 滾笑聲，khau-sé（剾洗）歌星。我收聽吳樂天講古廣播，廖添丁、賣鹽順仔，變化萬千，he 是華語無法度表達 ê 意境。
我禮拜日去教會主日學，聽台語講道，感覺牧師講台語是古雅 koh 溫柔；有時 tòe 阮阿爸聽「黨外」演講，台頂用台語講政治，罵中國國民黨。我會記得有一位演講者講：「咱講台語，在場 ê 國民黨抓耙仔『講國語兼捲舌』，聽無啦！」彼陣電視有楊麗花歌仔戲、黃俊雄布袋戲，街頭巷尾猶會聽著台語臆謎猜、四句聯、七字仔。
10歲 ê 我，聽母語，講台語，耳空聽 kah 真歡喜，喙講 kah 真自然，實在 sù-siông。我愛看故事冊，目睭看 ē-tio̍h ê 攏是華語 ê 冊、報紙 kap 雜誌，唯一 ê 台語讀物竟然是《白話字聖經》，m̄-koh我 sòa 讀無。除了這以外，我無看 tio̍h 別 ê 台語出版品。Hit 時，我 giâu-gî，台語是 m̄ 是 kan-na 聽、講，無法度「讀」kap「寫」？幾年了後，我讀國中，正是1980年代尾期卡拉OK興起 ê 時，第一擺到KTV，看 tio̍h 台語歌字幕是用漢字勉強表達 ê 台語發音，hō͘ 我 koh khah 霧 sà-sà。我真期待有台語讀物，學會曉阿嬤熟似 ê 白話字，享受用母語讀冊 ê 趣味。
一直到1991年《教會公報》台文版復刊，我才開始有機會好好仔讀台語，欣賞台文寫作。Tú 開始讀全羅 kap 漢羅書寫 ê 文章 sui-bóng 食力，m̄-koh 一字一句慢慢仔讀，愈讀愈心適，尤其是台語詩，聲調押韻，氣口十足。仝年我 tī 教會讀 tio̍h《台文通訊》，mā tī 大學長青團契讀 tio̍h《新使者》雜誌內面 ê「母語葡萄園」，增加讀 kap 書寫台語文 ê 機會。
因為《教會公報》台文版 ê 啟發，hō͘ 我有機會接觸日本統治台灣時 ê 白話字文章，親像蔡培火 tī 1925年寫 ê 散文《十項管見》（Cha̍p-hāng Koán-kiàn）、林茂生 tī 1924年寫 ê 劇本《路得改教》（Lō͘-tek Kái-kàu）。
《教會公報》台文世界30週年，hō͘ 我想起家己 ê 台語生活，原來，語言、母語 ē 生養情感、認同 kap 信仰。黃武東牧師tī《黃武東回憶錄》講：「白話字教導信徒，hō͘ 信徒脫離青盲牛 ê 痛苦，改變 in ê 一生，以及世代子孫 ê 命運。」按呢，2021年 ê《教會公報》「台文世界」咧？台語 kap 逐族群母語面臨危機，至少這个「hō͘ 信徒脫離母語文盲」ê 園地，ē-tàng 鼓勵逐族群 ê 母語寫作，肯定 in lóng-sī 正港 ê 台灣文學，mā ē-tàng 改變信徒，栽培讀者 kap 作者，影響世代子孫 ê 命運。
延伸閱讀：
【特別企畫】白話字──珍貴 ê 文化資產-1
【特別企畫】期待台文 ê 米該雅-2
【特別企畫】上帝引 Chhōa ê 台文路-4
【特別企畫】教會公報台文重頭生30冬-5
【特別企畫】我 ê 寫作過程-6
【特別企畫】牽手做伙行-7
