(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
【台文版復刊30週年紀事】
1885年巴克禮牧師用 PE̍H-ŌE-JĪ（白話字）發行台灣頭一份報紙《Tâi-oân Hú-siâⁿ Kàu-hōe-pò》（今《台灣教會公報》，簡稱《教會公報》）。1969年3月中國國民黨政府禁止白話字，1049 kap 1050期合併出刊，成做最後一期 ê 白話字報紙。Kāng 年12月，《教會公報》復刊，改用中華民國語發行，停止使用84冬 ê 白話字。經過22冬後 ， 1991年9月22日《教會公報》第2064期正式開設兩版〈台語特刊〉，用台語漢字 kap 白話字刊登文章。2002年，台文版由兩版縮作一版。算起來，台文版復刊到今，拄好滿30冬矣。本期 kap下期特別企畫專題，邀請歷年來佇台文版筆耕 ê 作家，分享 in ê 心情，mā 祝福台文版復刊30週年。未來 ê 路猶真長，向望讀者多多支持台文版，用母語寫作投稿《教會公報》，利益母語使用，落實台灣基督長老教會「認同所有的住民」ê 信仰告白。 （《台灣教會公報》台文版主編林碧堂）
◎ 陳金花
Ùi生物 ê 生湠 khòaⁿ 台灣語文 ê 傳承，ùi 宜蘭腔 ê 特殊 tì 覺母語 ê 流失。心情若親像 teh 傳教，我嘛定滾笑「講著台語就到」。我認真tī 社區大學、高雄師範大學語文教學中心、國中、國小、幼兒園排 tīⁿ-tīⁿ ê 課攏有 kà 羅馬字（白話字）。
族群語言公共材，語言文化生活內，
先賢顧守 koh 交代，ài 傳 ài 寫族語在。
數百冬來撨 bē 在，出佇漢字歹記載，
上帝早就有安排，白話字寫上自在。
緣起到 taⁿ 19載，老師牽成教育界，
學生來 o̍h 若熟似，鼓勵母語寫出來。
看著報紙有刊載，心花總開笑咍咍，
創意靈感土地來，向望書寫 tàu-tīn 來。
行台語路，定定看見無仝意見造成分歧袂合，遮仝款愛台語 ê 人 soah 變做死對頭，相 giú 後跤，堅持 ka-tī ê 上好，kā 力量分散去 ah。我定咧想共生原理「真正 gâu ê 人 ī ài hō͘ 逐个 gâu， 是家己 gâu 就好」，因為一个人 gâu niâ 實在是無偌 gâu–lah，傳湠才是行大路。Beh 成就這項代誌，需要社會各種力量，逐个人 lóng tī 家己會使出力 ê 所在，跤馬 khut hō͘ 在，出力 tàu-sak。過程難免 tú-tio̍h 鹹、酸、苦、chiáⁿ，著 ài 做伙 tam 做伙行。
為著達到聽講讀寫，我 ê 課程大約設計36點鐘。除去白話字，koh 有台語俗諺、台語文學、台灣地理歷史。學習者真緊動 tio̍h 台灣心啟發台灣情，自按呢順勢鼓勵 in 寫一篇台語文來試驗所學。大多數寫出人生第一篇台語文，總算會當聽講讀寫，拍破母語青盲牛 ê 歹名聲，做一个光榮感十足 ê 台文人。
台灣基督長老教會自來就是白話字 ê 大本營，1885年到今 ê 報紙攏有 kā 台語文字化，有話有字 chiâⁿ liú-lia̍h，扞頭統治–ê kā 矮化，thún-ta̍h 到今無 ta-ôa。Chit-má 因為《國家語言發展法》露出 sió-khóa á 光。母語欲 koh 徛起來 tio̍h 照上帝所賜，認捌聖經 ê 法度。Tī 學寫這 ê 坎站，因為免除初學者對白話字抗拒 ê 心理因素，著用「簡單 koh 威力十足」ê《台語羅馬字創意教材》。用這款合規律 koh 高效能 ê 循環紡–落去。學習者透過放煙火、開雨傘花、蝶仔飛、食披薩學 tio̍h 子音母音聲調 ê 拼音規則，無啥負擔，那學那𨑨迌，快速學 tio̍h 白話字 ah。白話字會使用 tī 漢字寫 bē 出來 ê 台語詞，tō m̄ 免激破頭腦硬想怪漢字按怎寫 ah。
徛頭前 ê 有張復聚、蔣為文、黃招榮、蔣日盈 téng 師長，kap 濟濟台語 siăn-pái 陪伴行 tī 台語路 nih 做我 ê 後靠，嘛足珍惜來學 ê 學員真心付出，寫出 ín ê 母語情。
除去鼓勵投稿各台文刊物，嘛準備 kā 學員第一篇 ê 台語文章出版成做台語專冊。特別 ài 感謝有台語認證 kap 有咧刊登台語文 ê 報紙雜誌，特別是《台灣教會公報》有開闢台文版，hō͘ 台語文字化 ê 路愈行愈闊。
延伸閱讀：
【特別企畫】白話字──珍貴 ê 文化資產-1
【特別企畫】期待台文 ê 米該雅-2
【特別企畫】我 ê 台文生活記持-3
【特別企畫】上帝引 Chhōa ê 台文路-4
【特別企畫】教會公報台文重頭生30冬-5
【特別企畫】我 ê 寫作過程-6
