(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
【台文版復刊30週年紀事】
1885年巴克禮牧師用 PE̍H-ŌE-JĪ（白話字）發行台灣頭一份報紙《Tâi-oân Hú-siâⁿ Kàu-hōe-pò》（今《台灣教會公報》，簡稱《教會公報》）。1969年3月中國國民黨政府禁止白話字，1049 kap 1050期合併出刊，成做最後一期 ê 白話字報紙。Kāng 年12月，《教會公報》復刊，改用中華民國語發行，停止使用84冬 ê 白話字。經過22冬後 ， 1991年9月22日《教會公報》第2064期正式開設兩版〈台語特刊〉，用台語漢字 kap 白話字刊登文章。2002年，台文版由兩版縮作一版。算起來，台文版復刊到今，拄好滿30冬矣。本期 kap下期特別企畫專題，邀請歷年來佇台文版筆耕 ê 作家，分享 in ê 心情，mā 祝福台文版復刊30週年。未來 ê 路猶真長，向望讀者多多支持台文版，用母語寫作投稿《教會公報》，利益母語使用，落實台灣基督長老教會「認同所有的住民」ê 信仰告白。 （《台灣教會公報》台文版主編林碧堂）
◎
蘇晏德
《台灣教會公報》tī 1969年，hō͘ 外來政權 at 斷筆尖、鏨斷手骨，禁止咱用羅馬字（白話字）書寫咱祖先留–落來 ê 話語。其實 tī 1956年國民黨 to̍h 雞掠厝拆，tī 學校禁止學生講「方言」，若無講「國語」to̍h 是無愛國，自按呢台灣人 ê 喙舌 mā hō͘ 人割斷。自1969年禁止白話字書寫，經過22冬，到1991年9月 chiah 閣出現台文版 ê 爸母話。其實 tī 1969年進前國民黨 to̍h 禁止教會用白話字傳教，閣全面扣押白話字 ê 台語聖經。錯誤 kah 歧視 ê 語言政策，致使台灣人漸漸看輕家己 ê 母語，祖先 ê 話語少年人當做無值錢 ê 糞埽，母語 chiâⁿ 做老人資源回收 teh 講 ê 話。
《教會公報》台文版重新出發已經30冬，一份台文刊物 beh 生存30冬，套用古早人講 ê 一句話，ká-ná 是 teh 講 báng-gah。1991年我已經會曉看教會白話字，m̄ -koh 猶 bē 曉寫白話字，到1995年 chiah 正式練寫 Lô-má-jī。斯 tong-sî 台灣 chiâⁿ oh 得看著台文刊物，《教會公報》台文版 tiām-tiām 掖種，ûn-ûn-á puh-íⁿ，hō͘ 台文作家有發揮 ê 空間。雖罔會曉寫台文 ê 人愈來愈 chē，m̄-koh 台語 soah 愈來愈稀微。清國 hō͘ 人民吸鴉片，後–來猶會清醒；chit-má 政府已經無禁台語，tian-tò連長老教會 mā 中毒猶bē cheng-sîn。
我從事台文運動是 tùi 1995年開始，1995年3月 chhe 9，Tīⁿ Jî-gio̍k（鄭兒玉）牧師來高雄九如路 Han-chû 園，陳哲男服務處開「台語羅馬字初級班」。我是台南神學院台語文化教室第一期 ê 學生，kah 台羅會創會 ê 理事長 Tiuⁿ Ho̍k Chû 醫生 lóng 是牧師頭一期 ê 學生。高雄班大約有80人，上課 ê 時，牧師問在場 ê 學員，啥人有學過白話字？我 gia̍h 手講：「我 tī 教會學過6點鐘。」牧師隨講：「蘇晏德你 m̄ 免讀初級班」。我hō͘ 牧師直升中級班，koh 安排五个初級班 ê 學員 hō͘ 我指導。我真正是 é-káu–ê teh 死 kiáⁿ，有話無 tè 講。因為 hiàng 時會曉白話字 ê 人無 chē，to̍h 因為我有學過6點鐘，牧師隨叫我做義工老師，to̍h án-ne我開始26冬 ê 母語教學kah 台語寫作。
Tī 我 ê 記持當中，因為教學 ê 需要，tùi 1998年開始 gia̍h 筆寫台文正式投稿，想著啥 to̍h 寫啥，無主題漢羅 lām-chham 烏白 bú。Tī 台文界我 m̄ 是 siǎn-pái，m̄ -koh 論資歷 mā 算真早 ah。從事台語教學26冬，時間過了嶄然仔 kín，我 kah 《教會公報》台文版結緣已經23冬 ah。Tī chit 23冬 ，我 kah 我 ê 學生投稿 ê 件數，包括詩、散文有 kúi-nā 百篇。最近幾冬寫台文 ê 人愈來愈 chē，這是好現象，m̄ -koh khah 失望 ê 是投稿 ê 文章愛等chiok 久 chiah 會刊登，ká-ná 袂輸孤黃（貓頭鷹） teh 叫-kú-kú。Tī-chia beh 建議增加台文版 ê 頁數，hō͘ 台文作家有 gia̍h 筆 ê 氣力。
祝福《教會公報》台文版上少 ē-tàng 活到300冬，最後我 beh 寫一首藏頭詩來祝福「《教會公報》台文三十週年」。
教 會公報重頭 siⁿ，
會 友寫作來聯誼，
公 開討論有意義，
報 送訊息到天邊，
台 文是咱 sai-khia 錢，
文 章保留台灣味，
三 十週年鹹酸甜，
十 分感謝鬥支持，
週 年記念添喜氣，
年 年進展救母語。
延伸閱讀：
【特別企畫】白話字──珍貴 ê 文化資產-1
【特別企畫】期待台文 ê 米該雅-2
【特別企畫】我 ê 台文生活記持-3
【特別企畫】上帝引 Chhōa ê 台文路-4
【特別企畫】我 ê 寫作過程-6
【特別企畫】牽手做伙行-7
