(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
蘇晏德
我對妳無了解，m̄ 知妳對佗位來，我kan-na 知影妳是台南神學院 ê 學生歐玉薇。聽講今仔日妳第一擺徛講台，tī 路竹長老教會傳講上帝 ê 話語，我 m̄ 知影妳幾歲，干焦知影妳是一个足少年 ê 查某囡仔，妳 kā 人生 ê 第一擺獻 hō͘ 路竹教會。自頭到尾我誠斟酌 mā 足認真聽妳講道，一句一句刻牢 tī 我 ê 內心，妳講第一擺徛講台跤手肉 phi̍h-phi̍h-chhoah，雖罔妳猶需要看稿，m̄ -koh 猶原真有自信，一點仔攏無含糊。今仔日證道 ê 題目「為主發光」，對我來講，妳今仔日真正是為主發光。
Tī 台灣上有本土意識 ê 長老教會，台語已經 hō͘ 華語刣–死 ah，其他 ê 教派更加免講 ah，台灣本土語言 tī 台灣全部淪陷孤 khu̍t 絕種。台灣 ê 原住民語 tī 安寧病房等死，客語 tī 加護病房 chhun 一點仔氣絲仔，台語 mā 已經掛急診 ah。上帝創造 ê 話語無人疼，上帝創造 ê 話語無阿爹無阿娘，kám 講過去 tī 台灣上有本土意識 ê 長老教會，猶閣恬恬 m̄ 出聲。歐玉薇一个少年查某囡仔，hō͘ 人印象深刻，an 頭到尾全程台語講道，原汁原味無色素無滲一字華語，這點連牧師 mā 做 bē 到。
台灣人對家己無信心，自1949年國民黨來統治台灣，台灣人 ê 喙舌已經 hō͘ 人割斷。Tī 日本，日本人講日語；tī 英國，英國人講英語；tī 香港，香港人講香港話；tī 中國，中國人講中國話；tī 台灣，台灣人講台語？Ká-ná m̄ 是。Tī 台灣多數 ê 人講中國話，kám 講台灣是中國 ê 殖民地？台灣人無自信，m̄ 講家己 ê 話，這款 ê 民族 kám 會出頭天？囡仔 bē 曉講台語，大人 m̄ 教囡仔講台語，老人反 tńg kah 囡仔講無精光 ê 華語，講台語救台灣，Chiâⁿ 做淒涼暗淡 ê 一句話，有一工台灣 nā 無人講台語，咱 tòa ê 所在 kám 閣是台灣？
感謝上帝透過歐玉薇傳講 ê 信息，「為主發光」向望 chiâⁿ 做台灣 ê 希望，「講台語救靈魂」m̄ 是口號。窮實 tī 我信主以後，定定邀請我 bē 信 ê 老母來教會禮拜，伊攏拒絕，一直到二冬前，路竹教會有聘請外教會 ê 牧師來培靈，我火燒林投──bē 死心，閣邀請猶 bē 信主 ê 老母來教會，伊竟然歡喜來赴，m̄-koh 聽 kah 一半伊講 beh 轉–去，我問伊啥 in-toaⁿ？伊講牧師講華語伊聽無，真正火燒罟寮──全無網（望）。最後用一首台語詩來表達我 ê 心聲。
＊台語 bih tī 佗位？
台語你是 bih tī 佗位？
你 kám 知影阮 ê 目屎四淋 sûi
阮 ê 心像針 teh ui（揻）揻
The̍h 著傷心離別 ê 破瓷
無聲無說孤單 teh 吐氣
阮 ê 心已經破碎
春天 ê 斑芝仔有魂無體
熱天 ê 鳳凰花枯焦 lak 落地
你是失落光芒 ê 星
原本是主人煞變成過客
沿路揣無燒 lō ê 徛家
你予台灣人捒落萬底深坑
台語台語你 kám 知影？
阮是你 ê 心肝仔囝
你 kám 有聽 tio̍h 阮 ê 心聲
為啥物 tī 台灣揣無你 ê 形影
你是阮 ê 阿爹 kah 阿娘
請你牽阮 ê 手 chhōa 阮做伙行
寒
寒寒寒
寒寒寒寒寒
冷冷冷冷冷
冷冷冷
冷
