(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
歹銅舊錫
延續「閱讀」ê 思考，我想欲進一步討論讀者 ê 想法、心理，因為這 mā 是欲開始寫作進前真大 ê 議題。準講作家無欲 kap 讀者做連結，kan-taⁿ 做家己講家己 ê tāi-chì，雖然 lóng 真好，總–是，he 有影袂吸引較濟人。咱 tī chia 是真直接，tiau-kang ùi「功利」來看，án-ne 有影拍損。親像你聽人講故事，內容 lóng mā 是有 si-á-geh 過，才通寄望 ē-tàng 改變聽眾，甚至教育聽眾。作家從來袂講這是為 tio̍h in ê「利益」，in 講這是「文學」、「藝術」ê 力頭。
今，ùi「閱讀」文本一層一層 kā in ê 結構拆開，主題是 siáⁿ？作者想欲表達是 siáⁿ？Hō͘ 你感動 ê 是 siáⁿ？你敢有仝款抑是無仝 ê 經驗、看法……等等，這 lóng 是你寫作進前 siōng 好 ê 自我訓練。學習 án-chóaⁿ 感動人，表達家己心肝頭 ê 感受，這敢 m̄ 是 lóng ài 練習 ê？何況欲寫落來，óa 靠文字 niâ。所致，閱讀成做作家寫作頭一項 ê 基礎功夫。
閱讀是靈感 siōng 好 ê 來源，因為殖民歷史 ê 因端，台語作品文類相對來講 khah 保守，範圍 khah e̍h。母語作家敢有可能 kan-taⁿ 讀母語作品 niâ？若是，近親相 thòaⁿ，有真大 ê 機率 lóng mā 是一寡欲臭酸 ê 物，讀者敢袂 siān？敢有可能 kā 市場做大，吸引 koh-khah 濟 ê 讀者，hō͘ 母語真正行向生活？
寫母語就是做社會運動，做運動 ài 有時間 kap 金錢。咱 m̄ 驚人講看錢重，無錢是 beh án-chóaⁿ thīn 母語作家出 ê 冊？一本台語冊算300 kho͘，保守來講，一冬至少買20本台語冊，雜誌社寄付算算 leh，冊錢上無 mā 需要1萬 kho͘，che koh 無包含買華語冊 ê 開銷。咱 mā 真知，平均來講，一个台灣人一冬才買四本冊！這四本內底敢有母語冊？這頭前就 lóng 捌講過，就 koh mài 論。
某種程度來講，我有時真無佮意人直直 làu 台語文學，soah m̄ 捌看過伊好好 á 寫一篇散文，甚至是個人感想心得。就親像，無 hiah gâu 趁錢，袂曉理財，koh siáu 想欲 khah 早退休。真歹勢，咱最近 lóng lia̍h「錢」做例，是欲點出文學 ê 冊 kan-taⁿ 是文類 ê 一部分 niā-niā。咱若想欲完成咱 ê 母語教育，無應該獨獨 hoah 母語文學，就親像咱學英文，mā 無 kan-taⁿ lóng 讀英語文學，讀大學 ê 時有濟濟指定教科冊是用英文寫–ê。
寫作百百款，mā 有小說 leh 寫理財，親像《曼尼先生》，用小說 ê 手法 hō͘ 讀者理解金錢 ê 觀念。Ùi chia 來思考，是咱作家袂記 tit 讀者，無 kap 讀者做連結，市場才歹，運動無 koh-khah 進步，範圍傷過 e̍h ah。直直講文學，mā tio̍h 思考咱是欲講 siáⁿ 主題、佗 chi̍t 方面，有時咱 lóng 無好好仔認捌家己，m̄ 知影家己想欲表達 siáⁿ，就欲做作家。你 nā chim-chiok，會發現寫故鄉、歷史、政治、親情、愛情 ê 母語作品占大多數。這對母語提升 tiāⁿ-tio̍h m̄ 是一个好現象。台語文類 ê 議題、閱讀 ê 題材 koh sòa–落-去，若欲期待較濟少年人來使用台語，siōng 好出寡相關財經 ê 冊，討論 án-chóaⁿ 面對未來、解決工課場 ê 問題、馬拉松訓練……等等。A̍h 是，逐家 lóng 感覺去讀華語冊就好？若是這款 ê 想法，文學冊讀華語冊就好 ah。咱去公報社買冊，mā 不止仔濟基督教作家利用聖經 leh 談理財，有錢奉獻相對 koh-khah 有效應，才 thang 做 koh-khah 濟 tāi-chì。無，直直講救母語，有滾絞 ê 使命，腹肚 seng hâ leh？Án-ne 是 thang 行 gōa 久長 leh？
這篇 li-li-lak-lak 小可點 tio̍h 閱讀是愛有寡 mê 角，mā koh 點 tio̍h 咱想看 māi 家己想欲讀 siáⁿ-mi̍h 方面 ê 冊，這應該 lóng 無限定範圍才著。閱讀 ē-tàng 講 ê tāi-chì 傷濟，咱 chia 是欲點醒母語人，咱千萬 m̄-thang beh 寫 m̄ 讀，a̍h 是 kan-taⁿ 讀母語 niâ，這款學習思維有衝突。假使咱對閱讀有真大 ê 體會，有意識用母語來理解，mā 學習著一寡文學手法，接 sòa 落來就放手寫，而且是寫任何文類 lóng ē-sái。
