十喙九尻川 Cha̍p-chhùi káu-kha-chhng!

(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形,配合Firefox瀏覽器來讀)

作者:李南衡

福伯佇 in 客廳看報紙,看我來,伊真歡喜。開喙 tio̍h 大聲罵講:中國國民黨 in hiah-ê 人有影是台灣俗語所講 ê「十喙九尻川!」(Cha̍p-chhùi káu-kha-chhng!)我 thiau 工問講,十喙是講有十个人,你講九尻川,是講十个人有一个生來無尻川是 bo͘h?伊 koh khah 大聲罵講:我講九尻川是講九个人,加一支喙是加出來講閒仔話 ê。我佇伊當 to̍h 火 ê 邊仔 ia̍t 風,問講:你那會使罵中國國民黨 in hiah-ê 人是十喙九尻川咧?伊 ê 火有影 khah to̍h 起來。伊講,3月中,武漢肺炎佇法國進入第三輪流行,攏總確診已經超過452萬例、死亡人數超過9萬4000外人,巴黎有19个區封鎖起來。咱台灣到3月19確診才拍破1000个例、死亡人數攏總10个人,莫怪美國《紐約時報》謳咾講台灣是世界疫情動亂中 ê「世外桃源」,做 kah chiah 呢好,猶有 hiah 濟閒仔話 thang 講,實在會 hông 受氣!咱干單講「武漢肺炎疫苗」chit 項 tio̍h 好。

台灣 ê 疫情會使講是全世界上無嚴重 ê 所在,事實上,對武漢肺炎疫苗 ê 需求無 hiah 呢迫切。按呢 tio̍h 有閒仔話講:全世界無人 beh 賣疫苗 hō͘ 咱台灣,連 bat 作過總統 ê 馬英九 mā 直直叫政府 m̄-thang 排除中國疫苗在外,喝到路尾,陳時中部長擋 bē tiâu 才回應講,m̄-nā 照咱現時 ê 法律不准進口中國疫苗,koh khah 要緊 ê 是中國 ê 疫苗無論佇安全、有效性等技術性資料攏無完整,所以無考慮買中國疫苗。原本咱有 kah 德國 BNT 講好 beh 買疫苗500萬劑,卻因為中國介入才發生變化。進行中 ê 代誌無對外公布,中國國民黨 in hiah-ê 人 tio̍h 罵講無透明,但是講講出來 tio̍h hō͘ 中國阻礙破壞。陳時中部長最後 tio̍h kā 已經確定買好 ê 疫苗講出來,像講透過 COVAX 以及向 AZ kah 莫德納(Moderna)買 ê 2000萬劑疫苗已經簽約,大部分會 tī 5、6月到貨,後期主要 beh 靠國產疫苗,若好勢 mā 會 tàng 拍開外銷市場。Bat 作過中國國民黨時代衛生署長楊志良罵講「鬼 beh 買!」世間那有喙 bái kah chit 款 ê 人!

買 tio̍h ê AZ 疫苗運到位 ah,中國國民黨 in hiah-ê 人 koh 罵講,有買 tio̍h 疫苗是按怎 m̄ 敢講?是別人訂了無愛 ê!陳時中部長宣布第一線 ê 醫護人員優先第一梯次注疫苗,隨時有人罵講,是按怎陳部長驚危險 m̄ 敢注?3月22,行政院蘇貞昌院長 kah 陳時中部長去台大病院 chhōa 頭先注,公布注疫苗實況錄影 hō͘ 全國人民看,to̍h koh 有閒仔話講 in 是注假 ê!

福伯問我,按呢是 m̄ 是「十喙九尻川」?我應講,m̄ 是,應該講「九喙十尻川」才 tio̍h,因為九個人有加一個尻川 teh 亂放屁!

廣告/聖經充滿我-經文填充本

我有話要說