【特別企畫】思念我鬱卒 ê 朋友-1

Image Victoria_Borodinova from Pixabay

註:本文為報導、並非醫療評估或治療指導,若有身心健康疑問,請仍需與專業人士討論。

(相片提供/Pixabay,製圖/湯立琳)

 阿米仔

今年,我有兩个親友離開這個世間。一个是我90歲 ê 阿姨,一个是真情可愛ê青年朋友。除了死亡,猶有一個共同點,就是佇世間 ê 日子,兩人攏因為憂鬱(iu-ut)來受苦。任何性命ê消失,攏是必然ê。但是,欲怎樣活、怎樣煞戲,攏將我絞入波瀾裡。

死去 ê 袂閣講話,總–是毋捌真正離開,因為怹(in)佇在生者 ê 性命中繼續作用。活咧 ê 人懷抱難解 ê 情感 kap 念頭,佇過往互動交流 ê 形影內底,慢慢揣著家己 ê 所在 kap 出路。阿元選擇結束性命了後,我開始頭眩、苦痛,有一睏仔,我一句話攏講袂出,親像摔落深淵,內面有重頦頦(hoaiⁿh-hoaiⁿh) ê 逐種情緒糾纏做伙。

佇社交媒體頂面,我看著無仝 ê 人用無仝 ê 方式咧追思、數念、安搭 in 家己。毋過,我看袂落去,聽袂入去。彼日,我 ê 表兄共我講阿姨過身 ê 消息,我 chôaⁿ 愣去(gāng–khì),我用真濟時間去整理自己,予(hō͘)我 閣一擺想著 kap 阿元 ê 互動。佇阿元選擇結束性命 ê 前一个禮拜,阮才結束一个線頂讀冊會,彼(hit)時,伊講伊欲閣參與、欲閣來阮兜食飯開講……點點滴滴親像走馬燈直直踅(se̍h),按怎攏停袂落來,主持讀冊會 ê 老師也因為按呢,幾若工攏睏袂落眠。

怹不時活佇深淵內面,這擺,我佇深淵 ê 邊仔 略略仔(lio̍h-lio̍h-á)感受著彼款凌遲,甚至我憢疑(giâu-gî),我嘛佇另外一个深淵。我干焦會當用文字紀念彼段旅程,期待家己,當咱有親友佇憂鬱 ê 大風湧(éng)內面 ê 時,咱家己咧照顧別人 ê 時,嘛著愛照顧好自己。咱必需理解,咱只是支持網絡中 ê 一个,咱需要逐家做伙編織一張疼惜 ê 網,共(kā)咱 kap 憂鬱奮鬥 ê 親人朋友箍做伙。

(相片提供/阿米仔)

♥ 一開始接著消息 ê 時 ♥

我共阮囝講,阿元哥哥轉去上帝懷中,以後無法度閣做伙𨑨迌。講到遮,我心內猶閣真著驚、毋甘、無想欲承認,我憢疑,是毋是閣有機會做一寡代誌。我足受氣,足毋甘,足擘腹(peh-pak),因為阿元 ê 決定,確實用利劍將伊 ê 老母 ê 心鑿(chha̍k)透過。

阿魯為我擦去目屎,講:「哪會遐大滴……」睏前,阿魯講:「我驚驚無想欲轉去上帝遐。」
陪伊睏 ê 我,講:「咱轉去 ê 時間猶袂到。做伙來為阿元哥哥佮伊 ê 媽媽、厝內 ê 人祈禱。上主 ah,上主 ah,求祢憐憫。接納阿元哥哥,安慰伊 ê 媽媽、妹妹……佮所有數念伊 ê 人……」
阿魯睏去了後,我佇足長 ê 暝內面沉思。

(相片提供/阿米仔)

♥ 對無話到有畫 ♥

恁做伙插翼,飛去遠遠 ê 所在。
有一條目屎 ê 河流啊流,
我坐船划 kui-po͘(規晡),也揣無住 ê 兜。

有一條性命 ê 河流啊流,
我佮划船 ê ,
做伙去遠遠 ê 彼爿(hit-pêng)。
佇河 ê 邊仔,有樹仔,
照時開花結實,
怹青翠 ê 葉,
欲醫治破碎 ê 眾生。
真好運啊!
當葉仔落落來(lak–lo̍h-lâi),
佇水面踅圓箍仔,
我因為芳氣,就有平安。

延伸閱讀 :

【特別企畫】異鄉人的心靈獨白-2

【特別企畫】牧養憂傷的小羊-3

【特別企畫】以愛伴行,傾聽憂鬱心聲-4

 

我有話要說