(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
作者：蔡榮信
天光 ê 時，聽著樹蟬咧吟詩，
叫醒阮厭𤺪 ê 心神，起來。
自然 ê 聲音，引起阮自由 ê 心聲，
啥時脫離黑暗 ê 陰影，
恢復快樂幸福 ê 京城。
著唱歌，袂梢聲，美妙歌聲，迵天城。
著拍拚，莫著驚，剛強壯膽，向前行。
著向望，免驚惶，同心合意，一定贏。
Thiⁿ-kng ê sî, thiaⁿ-tio̍h chhiū siân teh gîm-si,
Kiò-chhíⁿ goán ià-siān ê sim-sîn, khí–lâi.
Chū-jiân ê siaⁿ-im, ín-khí goán chū-iû ê sim-siaⁿ,
Siáⁿ-sî thoat-lī o͘-àm ê im-iáⁿ,
Hoe-ho̍k khoài-lo̍k hēng-hok ê kiaⁿ-siâⁿ.
Tio̍h chhiùⁿ-koa, bē sau-siaⁿ, bí-miāu koa-siaⁿ, thàng thiⁿ-siâⁿ.
Tio̍h phah-piàⁿ, mài tio̍h-kiaⁿ, kong-kiông-chòng-táⁿ, hiòng-chiân kiâⁿ.
Tio̍h ǹg-bāng, bián kiaⁿ-hiâⁿ, tâng-sim-ha̍p-ì, it-tēng iâⁿ.
