(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
作者：鄭如絜
暝時 厝瓦佇咧跳 mambo
叫賣 過時青春 ê 跤步
喝醒盹龜 ê 靈魂
一段無節奏 ê 音階
共粗淺搖笱 成做窞肚 ê 舞台
佇無月光 ê 野外
門扇枋恬靜 ê 靈魂
揣無原底 ê 安穩
硬楗 ê 胸坎 攝襇 ê 青春
不而過是過路使弄 ê 調符
下一个舞台 佇看袂著 ê 野外
有暗光鳥恥笑 ê 聲嗽
Mî-sî chhù-hiā tī-leh thiàu mam bo
Kiò-bē kòe-sî chheng-chhun ê kha-pō͘
Hoah-chhíⁿ tuh-ku ê lêng-hûn
Chi̍t-tōaⁿ bô chiat-chàu ê im-kai
Kā chho͘-chhián iô-kô chiâⁿ-chòe thām-tó͘ ê bú-tâi
Tī bô goe̍h-kong ê iá-gōa
Mn̂g-sìⁿ-pang tiām-chēng ê lêng-hûn
Chhōe-bô goân-tóe ē an-ún
Ngē-kēng ê heng-khám liap-kéng ê chheng-chhun
Put-jî-kò sī lō͘-kòe sái-lòng ê tiāu-hû
Ē chi̍t ê bú-tâi tī khóaⁿ bē-tio̍h ê iá-gōa
Ū àm-kong-chiáu thí-chhiò ê siaⁿ-sàu
