Chúi 水

(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形,配合Firefox瀏覽器來讀)

作者:顏美雀

頂 chām-á 全台鬧水飢
庫底焦焦水虛虛
佳哉這馬有解除
若無連生活 tō͘ 難維持

春花望露水
花欠露水緊離枝
作穡 ê 人望雨水
規年若無雨水
農作物攏齊毀

生理人靠喙水
好喙水業績做 kah 跤 thèⁿ-thúi
三日無食飯 iau 袂死
三日無啉水,生死門齊開

政治人物上 gâu 噴 nōa 水
是真是假考智慧
製造業排放出來 ê 汙水
環保問題上歹處理

人若無照天理
天著無照甲子
水若 siuⁿ 濟山崩地裂
雨若順順落,萬物總歡喜
風調雨順,國泰民安
這是百姓祈求 ê 福祉

Téng-chām-á choân Tâi nāu chúi ki
Khò͘-té ta-ta chúi hi-hi
Ka-chài chit-má ū kái-tû
Nā-bô liân seng-oa̍h tō͘ lân î-chhî

Chhun-hoe bāng lō͘-chúi
Hoe khiàm lō͘-chúi kín lî-ki
Choh-sit ê lâng bāng hō͘-chúi
Kui-nî nā bô hō͘-chúi
Lông-chok-bu̍t lóng chiâu-húi

Seng-lí-lâng khò chhùi-chúi
Hó chhùi-chúi gia̍p-chek chò kah kha thèⁿ-thúi
Saⁿ-ji̍t bô chia̍h-pn̄g iau bē-sí
Saⁿ-ji̍t bô lim-chúi, seⁿ-sí-mn̂g chiâu-khui

Chèng-tī jîn-bu̍t siōng gâu phùn-nōa-chúi
Sī-chin sī-ké khò tì-hūi
Chè-chō-gia̍p pâi-hòng chhut lâi ê u-chúi
Khoân-pó būn-tê siōng pháiⁿ chhú-lí

Lâng nā bô chiàu thiⁿ-lí
Thiⁿ tio̍h bô chiàu kah-chí
Chúi nā siuⁿ-chē soaⁿ-pang tē-li̍h
Hō͘ nā sūn-sūn lo̍h, bān-bu̍t chóng hoaⁿ-hí
Hong-tiâu ú-sūn, kok-thài bîn-an
Che sī peh-sèⁿ kî-kiû ê hok-chí

廣告/美好腳蹤368認購

我有話要說