(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
Chok-chiá: Tâi-bûn gín-á
Kak-sek: Tōa-kho͘–ê, Sán-kâu, Thâu-ke, Kim-tiû, Kòe-lō͘-lâng, (kháu-pe̍h)
【Tē 1 bō͘】
Tōa-kho͘–ê：Ài–ioh, koh kòe kúi-kang tō chhit-goe̍h–ah, beh sńg tiō ài thàn chit-má.
Sán-kâu：M̄ -chai sī beh kóng lí khiáu á-sī hàu-tai. Ná ē kiâⁿ hiah kú, lú-siā chi̍t-ê iáⁿ lóng bô khòaⁿ–tio̍h.
Tōa-kho͘–ê：Lí sī ba̍k-chiu kô͘-tio̍h lâ-á-bah–o͘h. Koh chhōe khòaⁿ māi–lah.
Sán-kâu：Tán–leh! Kám sī Kim-kim Lú-siā?
Tōa-kho͘–ê：Bô m̄-tio̍h! Lí khòaⁿ, Tōa-kho͘–ê chò tāi-chì, ū la̍t koh súi-khùi.
Sán-kâu：……Góa khòaⁿ sī má-siōng tiō chhut tāi-chì……
(In kiâⁿ ji̍p-khì lú-siā, thâu-ke sûi chhut–lâi chio-ho͘.)
Thâu-ke：Chia̍h-pá–bōe? Kám ū siáⁿ-mi̍h ē-sái ho̍k-bū ê?
Tōa-kho͘–ê：Góa sī Tōa-kho͘–ê, í-keng ū tēng pâng-keng–ah.
Thâu-ke：Góa khak-tēng chi̍t-ê……goân-lâi sī Tōa-kho͘–ê sian-siⁿ–ah, sit-lé sit-lé. Lín ê pâng-keng sī hô-hôa chóng-thóng thò-pâng, tī saⁿ-lâu, chhiáⁿ tòe góa lâi.
(Bô tiān-thui, kan-na ē-tàng iōng kiâⁿ–ê.)
Sán-kâu：Chit-keng lú-siā chiok khì-phài–neh!
Thâu-ke：Kám-siā. Che sī góa ê a-kong tùi Ji̍t-pún sî-tāi lâu–lo̍h-lâi ê chó͘-chhù, jīn-chin kóng khí–lâi, mā sǹg sī chi̍t-ê kó͘-chek.
Tōa-kho͘–ê：Thâu-ke chin-chiàⁿ ū ho̍k-khì–neh.
Thâu-ke：Mā ē-sái án-ne kóng. Pâng-keng ê só-sî tī chia, nā ū tāi-chì sûi-sî ē-sái kiò góa.
Tōa-kho͘–ê：Hó, nā án-ne kàu-sî tiō koh mâ-hoân lí–ah.
Tōa-kho͘–ê：WOW! Chit-tè bîn-chhn̂g mā siuⁿ sù-sī–ah.
Sán-kâu：Bo̍k-koài i kóng sī chóng-thóng thò-pâng ê chúi-chún–neh.
Tōa-kho͘–ê：Jî-chhiáⁿ chi̍t-àm kan-na 500 kho͘ niâ, bé tio̍h thàn tio̍h.
Sán-kâu：Tán-chi̍t–leh……Lí kha̍k-tēng lí bô kiám khòaⁿ chi̍t-ê “0”?
Tōa-kho͘–ê：Lí mā siūⁿ chi̍t-ē, la̍k-goe̍h-té hiah joa̍h, lú-koán bô chhiok-siau ná ē ēng–ti̍t. Lí khòaⁿ, kin-á-ji̍t lâi peh-soaⁿ koh lâi chia tòa ê kan-na lán nn̄g-ê gōng-tai niā.
Sán-kâu：Hó–lah, bô ài kah lí kóng che gō͘-sì-saⁿ–ah, góa seng lâi khí chhiâng léng-chúi.
Tōa-kho͘–ê：Nā án-ne, góa beh seng lâi chia̍h piáⁿ. (Tōa-kho͘–ê chhùi-lāi se̍h-se̍h-liām: Thiⁿ-khì jú joa̍h jú iau, ài thàn Sán-kâu chhut-lâi chìn-chêng chia̍h liáu-liáu.)
Sán-kâu：Eh, Tōa-kho͘–ê, góa í-keng sé hó, ōaⁿ lí–ah.
Tōa-kho͘–ê：Ná ē chiah tú hó–lah, góa piáⁿ mā tú chia̍h liáu, góa beh khí sé sin-khu–lo͘h.
Sán-kâu：……Sûi-chāi–lí–lah.
(Tōa-kho͘–ê ná kiâⁿ ná chhiùⁿ-koa, bē-kì-tit tàn piáⁿ ê tē-á.)
Sán-kâu：Eh, chit-ê Tōa-kho͘–ê goân-lâi ē chìn-pō͘–o͘h, kèng-jiân ē-hiáu kā chhn̂g-kin chhiâu hō͘ hó. (Sán-kâu chún-pī khì khùn.)
Tōa-kho͘–ê：Chiah chá tiō beh khùn?
Sán-kâu：Hehⁿ–ah.
Tōa-kho͘–ê：Sī kóng lí kám ū tó tio̍h góa ê piáⁿ tē-á.
Sán-kâu：……Hăⁿ……Lí tī bîn-chhn̂g-téng chia̍h mi̍h-kiāⁿ! Thái-ko-kúi–oh.
Tōa-kho͘–ê：Khí thô͘-kha chia̍h chiok mâ-hoân neh, ài tùi bîn-chhn̂g lo̍h-lâi, chia̍h liáu koh ài peh khì bîn-chhn̂g téng, chiok thiám.
Tōa-kho͘–ê：Kî-koài, góa èng-kai sī khǹg tī chia–ah…… (Tōa-kho͘–ê kha khì that tio̍h pùn-sò-tháng.) Hō͘ⁿ, lí chit chiah kâu, kā pùn-sò-tháng khǹg tī chia leh hām-hāi góa. Chin-chiàⁿ sī khòaⁿ lâng bô chheng…… (Tōa-kho͘–ê kā pùn-sò-tháng that hō͘ tó.) Ê, tē-á tī lāi-té–eh.
Sán-kâu：Lâng leh chò, thiⁿ leh khòaⁿ lah, thiⁿ-kong-peh–á lóng khòaⁿ bē kòe, chiah ē iōng pùn-sò-tháng kā lí chhòng-tī–lah.
Tōa-kho͘–ê：Kúi chiah beh sìn. Khah chá khùn leh, bîn-á-chài koh beh chiok chá khí-chhn̂g.
(Tōa-kho͘–ê khai-sí leh kô͘ⁿ.)
(Keh-piah pâng-keng hiông-hiông thoân lâi khàu-siaⁿ.)
Sán-kâu：Eh, (Sán-kâu iô Tōa-kho͘–ê.) lí kám ū thiaⁿ-tio̍h siáⁿ?
(Tōa-kho͘–ê leh hām-bîn：Pâi-kut mā ē-sái……)
Sán-kâu：Soah-soah–khì, èng-kai sī góa thiaⁿ m̄-tio̍h.
(Keh-piah lú khàu lú tōa-siāⁿ)
Sán-kâu：Góa tòng bē tiâu. Bē ēng ê, góa i̍t-tēng ài khì khòaⁿ tàu-té sī hoat-seng siáⁿ-tāi.（Thāi-sio̍k）
