Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: 林益彰
有關母語事事項項 ê 議討，踮佇台灣萬般 ê 語言場地，已經沓沓仔出入百花紅，眾人喝聲沖沖滾 ê 情狀。這是好代誌，毋過，嘛有真濟面向無定著需要逐家來討論。
以本筆佇《台灣教會公報》ê 台文世界長期觀察作例，雖罔這份刊物是對台灣台南為地基，其名煞在在點出，台文佮世界 ê chì-chiap 性，台文面向四海天下實腹 ê 能耐，講透底 ê，《台灣教會公報》佇紙報興旺史有家己 ê 特殊性，罕得看一份實體報有華語、羅馬字佮台語咧同齊做伙刊發。
無佗一種語言是該然愛食十七兩，徛算是死語言就愛依倚後輩剾挖，ka-lí-liân-lô（咖哩嗹囉），續後張擴深底。語言就若活栽翠青種 ê 比並，如何跟綴初初 ê 掖秧仔，發穎出芽到散葉開枝，對原底較cha̍t-chiⁿ（實櫼） ê 概念，文文仔予時間來尖鑽組合出，變竅使用，傳達意解 ê 功能。固然每粒粟種攏有伊生湠 ê 存在性，台文 ê 語言也同款，每種語言 ê 歷史跤跡，美學起鼓，攏袂當由在凊彩馬馬虎虎。
台灣是一座有濟濟語言 ê 國家，首挈台語來言說，歷經外來語、羅馬字、華語等字文系統 ê 透濫，相硞併合，有關台語 ê 用字、說解、傳達 ê 情狀，已經沓沓仔離脫初初 ê 意理，koh 再破明 ê，台語佇台灣已經 liâu-liâu-á（聊聊仔）展翼出家己 ê 概念、系統佮意解。
紲落來，毋管是台語 ê 有志人士抑是關注語言議題 ê 先輩，咱必需愛思考，有關台語該然按怎出兵，比如講，台語用字拼音 ê 情狀怎樣確立，台灣台語會如何發展，台語作官方語言確名 ê 必要性，濟濟語言會議多元角色 ê 相伨參與，講句邊仔話，咱台灣 ê 母語作家對語言 ê 做議量創新，有影誠有藝術性佮純粹性。台語本底 ê 利純猶誠萬丈深坑，毋但轉譯這途爾爾，猶有真濟面向會當書寫佮 nǹg-chǹg （軁鑽）。
踮阮上軟 ê 心有一个深淺 ê 夢，輕淺向望《台灣教會公報》作先鋒，會當敬招捌佇台文世界發言 ê 作家、牧師、教師、編輯等等，他日同齊做伙來台灣教會公報社筆者大團圓，逐家也會當佇這个會討中，坐落來，互通相識無仝 ê 思考能耐，予台語毋但只是佇紙本話山話水話玲瓏爾爾，台語也有伊誠濟變竅 ê 可能性。
