◎ 李秀鑾
這幾冬來，教會真強調讀聖經，這是一件真好的代誌。但是，真正讀過聖經的人攏知影，每一擺讀聖經，攏有無仝款的滋味、無仝款的體會、無仝款的安慰。舊年讀著的經節，參今年讀著時的感動是無仝款的，這就是啟示的意思。
會記得讀聖經學院的時，院長林瑞隆講過，啟示就是共人毋知影的代誌顯明、拍開，予人知影的意思。得著啟示應該是人有信上帝這个神、相信祂存在、大有能力，甚至謙卑讀聖經的話所得著的火光，心靈得著滿足佮新的靈通。也就是聖經所講的，毋是照文字，是照聖神所感動的異象，正是信仰的米糧，吃了後會有心涼脾透開、予人拍醒的感覺、得著醒悟、安慰，或是深深反省的感動。
文字寫到這，我想欲反省：時代咧進步，人的思想、環境有真大的變化，徛佇祭壇頂傳講上帝的話、耶穌的救恩「真理、活命、道路」的人，是不是有佇這个時代得著新的啟示，予羊群得著聖靈的開闊、感動，閣較認捌咱的天父上帝，雖然，這是無輕鬆的工作。
我嘛愛反省獻音樂的祭祀，恁有將人的心拍開、共聖神進入羊群的心變成柔軟，聽候上帝的話佇腹內掖種生根無？長老執事有佮聖靈交通每一擺的司會無？其實有時安安靜靜一分鐘嘛是一種祈禱。
牧者每禮拜至少有四擺講道，欲逐擺合眾人需要真無容易，因為時代進步真緊。總是濟濟思想上帝的話，關心時代種種的進展，社會的需要佮變化是真需要的，因為你是牧者，代替基督耶穌老師的責任牧養羊群。
會記得有一首聖詩的內容講起，上帝的故事：「是舊猶閣永新。」因為這本聖經，是上帝的話，是佇每一个時代攏會講話的冊，希望人人讀聖經攏得著啟示，嘛希望人人敬拜主的時，攏會當得著新的啟示，心靈清新受安慰，無論是透過一首輕的音樂，或是一段上帝的話、一個笑容。
最後我欲講的是：人人互聖靈的感動、期待上帝的同在、謙卑祈禱的心來參與敬拜，這个聖會就會滿足每一个人的需要，這個聖會就有聖靈活潑的趒跳，咱的同心聚會上完滿、上美的聖會，咱毋是干單來做禮拜的，是來予肢體完整、聖靈降臨的。做禮拜是人人攏要備辦心的。 （作者為自由傳道）
