Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀
Chok-chiá:姚志龍
台文世界好平台 Tâi-bûn sè-kài hó pêⁿ-tâi
文章多元眾人愛 Bûn-chiuⁿ to-goân chèng-lâng ài
推行台文無凊彩 Chhui-hêng Tâi-bûn bô chhìn-chhái
捒動母語做伙來 Sak-tōng bó-gí chò-hóe lâi
佇詩文內顯自愛 Tī si-bûn lāi hián chū-ài
公道義理攏盡在 Kong-tō gī-lí lóng chīn-chāi
報人疼惜文化財 Pò lâng thiàⁿ-sioh bûn-hòa châi
教會公報認真栽 Kàu-hōe kong-pò jīn-chin chai
育成精英入文海 Io̍k-sêng cheng-eng jp bûn-hái
逐家盡心口語在 Ta̍k-ke chīn-sim kháu-gí chāi
眾志成城媠文彩 Chiòng-chì sêng-sêng súi bûn-chhái
好事傳承版面內 Hó-sū thoân-sêng pán-bīn lāi
文筆幼膩項項來 Bûn-pit iù-jī hāng-hāng lâi
彩衣內涵攏盡在 Chhái-i lōe-hâm lóng chīn chāi
靜靜拍拚三十年 Chēng-chēng phah-piàⁿ saⁿ-cha̍p nî
待天殕光雞閣啼 Thāi thiⁿ phú-kng ke koh thî
種落向望當發穎 Chèng lo̍h ǹg-bāng tng puh-íⁿ
子若落塗著有期 Chí nā lo̍h thô͘ to̍h iú kî
閣再復育就發生 Koh-chài ho̍k-io̍k tō hoat-siⁿ
發出文藝媠歌詩 Hoat-chhut bûn-gē súi koa-si
生出飽滿好果子 Seⁿ-chhut pá-boán hó kóe-chí
進入壯年已有型 Chìn-ji̍p chòng-liân í iú hêng
行家寫作大流行 Hâng-ka siá-chok tōa liû-hêng
母親腔口訴心情 Bó-chhin khiuⁿ-kháu sò͘ sim-chêng
語言捷用腦精英 Gí-giân chia̍p ēng náu cheng-eng
逐家奮力齊向前 Ta̍k-ke hùn-le̍k chê hiòng-chêng
復到早前母語情 Ho̍k-tò chá-chêng bó-gí chêng
興起祖語新旅程 Heng-khí chó͘-gí sin lí-thêng