Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Tēⁿ Ka-tián
Ka-tiāⁿ chhit-cha̍p nî chêng
Tē-hng bê-sìn bô pêng-chēng
Mô͘-kúi sì-kòe teh chhiòng-hêng
Chhòng-tī peh-sìⁿ bô an-lêng
Chhù-lāi tōa-sòe bô pêng-an
Mn̄g-sîn pài-pu̍t kiû pang-chān
Bô-pō͘ bô-lō͘ chhōe Iâ-so͘
Chhōe-kiû hok-im Chú khòaⁿ-kò͘
Siōng-chú lîn-bín khui oa̍h-lō͘
Ta̍h-chhut sìn Chú ê kha-pō͘
Hoán-hóe lî-khui chèng chōe-ok
Mô͘-kúi pek-lâng ji̍p thian-kok
Chho͘-sìn sìn-tô͘ chin kan-khó͘
Oan-lí chū-hōe kiâⁿ hn̄g-lō͘
Ū-sî khe-lâu kap hōng-thāi
Oh-tit kòe-khe khì lé-pài
Sìn-tô͘ ū sìn ê kî-thāi
Chhòng-siat kàu-hōe pún-só͘-chāi
Tâng-sim kî-tó tâng lé-pài
Khòaⁿ-kìⁿ Siōng-chú hó an-pâi
Sait-kàu kòe-thêng ū hong-éng Sin-sim óa-khò ū tit-sèng
ǹg-bāng chū-hōe ōe kú-tn̂g Khí-chō sin ê lé-pài-tn̂g
Tâng-sim kî-tó tâng phah-piàⁿ Keng-le̍k tōa-mn̂g ê sū-kiāⁿ
Tāi-ke ló͘-le̍k chê hiòng-chêng Khòaⁿ-kìⁿ kàu-hōe ê hùn-heng
Le̍k-jīm thoân-tō kap bo̍k-su Oan-lí Hái-po͘ Chú jî-lú
Tāi-ke saⁿ-thiàⁿ tâng phah-piàⁿ Hùn-heng sèng-hōe tiàm tī-chia
Chhut-chîⁿ chhut-la̍t tâng ho̍k-sāi Saⁿ-chhin saⁿ-thiàⁿ tâng kèng-pài
Ín-chhōa hōe-iú bī-sìn-chiá Siōng-tè chiok-hok chiok kàu-gia̍h
Hôe-kò͘ kàu-hōe ê le̍k-sú Lán tòe sî-tāi to̍h hiòng-chêng
To-goân hiàn-sin hō͘ Chú ēng Chiâⁿ-chòe Ki-tok ê cheng-peng
Un-khûn kî-tó bô-sî-thêng Khûn tha̍k Sèng-keng bô-ài-êng
Jīn-bat sìn-gióng ê khoán-sit Bêng-pe̍k hok-im ê pún-chit
Su-sióng sîn-ha̍k ê ì-gī Si̍t-chiān Chú tiāⁿ ê tō-lí
Keng-kòe chhit-cha̍p ê chiu-nî Sū-hōng bô-hun ji̍t kap mî
Khún-kiû Sèng-sîn pang-chān goán Tòe Chú kha-pō͘ kàu éng-oán
