Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉張淑真
Chhím抱伊返–來，Snoopy哥哥kā號名「妹妹」。頭一站á發現伊ài吃魚，phòng-phòng ê金絲白毛，足成波斯貓，想講不如另外號一个名，叫「A-niau」 (阿貓)。自按呢，我lóng佮伊講台語，叫貓咪抑是niǎu～， 伊lóng會應。
天公伯特別安排A-niau來kap我做伴，伊不時kā我綴tiâu-tiâu。朋友足佮意伊，搶欲kā翕相，相爭boeh kā抱咧搶鏡頭，袂輸model。佮刺耙耙 ê Malukho͘h比起來，A-niau是溫馴無塊比，真正是khiáu-khì léng-lī ê美人狗。自從抱伊轉來，伊就無愛睏籠仔。我就提紙篋仔來客廳，chū 1个專用膨床hō͘歇睏。伊若有看著我就好，我是伊唯一ê倚靠。一半擺仔我出張，交帶哥哥照顧伊，伊會暝日phak tī門口等我，腹肚iau才勉強吃。
* * *
Oankuh佇厝–裡ê時，哥哥攏愛牽出去散步。哥哥嫌A-niau纏跤絆手，毋hō͘綴。A-niau tō khí-mo͘ bái，刁持走去人ê眠床頂放尿，hông搧尻川䫌。Oankuh是黃金獵犬，kau-chhiâng大漢，足好性，對A-niau足好意，phak佇土跤，隨在A-niau peh khit lih伊ê身軀頂chhū滑溜。A-niau煞kā Oankuh siâⁿ kah豬哥nōa sôe規土跤。差siuⁿ-chē lah，kin-pún 無可能捒做堆。
A-niau原本 ê主人專門飼貴賓狗，單單一隻瑪爾濟斯，第一胎就生3隻。A-niau滿月ê時，主人看伊較gia̍t，捙龜弄甕，chiâⁿ活潑。伊來阮兜彼當陣，Malukho͘h tng leh 吃心臟藥仔，無愛 chhap–伊，A-niau tō 草蜢弄雞公，有夠孽。社區十字巷路角間，有一隻烏狗chiâⁿ pháiⁿ，bat kǎng咬著傷。A-niau行過hia看tio̍h「小黑」，偏偏去kā弄，bô leh kā sìn-táu，激kah主人出來罵：「Lín狗仔hiah細隻，m̄顧hō͘好，咬著傷bô負責喔！」我學hō͘厝內ê人聽，A-niau tō頭仔phe-phe，眼神顯示「bô leh kiaⁿ lah」。敢是「狗丈人勢」，靠勢？不而過，伊普通時其實tiām chih-chih，bē烏白吠，人人呵咾有家教。若無看著伊，chhù-piⁿ根本m̄-chai goán tau有一个溫馴ê瑪爾濟斯小姐。本底我佮意ê狗若m̄-sī白色、長毛、母–ê，這款條件kan-nā瑪爾濟斯才有niā-niā。伊有濟濟優點：媠、巧、較袂lak毛、bô啥臭hiàn味、好教bē神經質亂吠、會顧家、𠢕sai-nai、骨頭勇、平均歲壽較長……。
* * *
A-niau ài有伴，佇厝內綴chiūⁿ綴lo̍h，連睏mā tòe來房間；日時綴出綴入，我若bô方便𤆬伊去，kā伊安慰一下，伊會乖乖去仆佇伊ê位，頭ǹg門口等我轉來。毋過，伊若看我綰公事包，無欲𤆬伊出去，伊會後跤thèⁿ koân，前跤giâ起來tah我ê跤腿，jiàu我ê公事包，無hō͘ tòe袂煞lih，姑不終才允伊， kā品講：「出去bē-sái吵喔！」無論去地政所、稅務局，抑是客戶hia，伊攏無聲無說，hiah-ê辦事員攏呵咾kah，足愛kā抱，想欲kā留落來。一半擺仔我無方便𤆬伊做伙出門，in顛倒會問：「Lín A-niau無來？」
老母蹛我chia ê時，我會叫A-niau顧阿媽，伊就會去khû踮阿媽ê邊仔，平常時kan-nā A-niau會弄阮tài憂鬱ê阿母笑。A-niau專門顧電鈴，電話若響，伊驚阿媽無聽著，嘛會叫人來接。
A-niau來chiâⁿ年，Malukho͘h tō離開goán，A-niau iā轉大人，m̄-koh，伊身體hiuⁿ-hiuⁿ，月事來洗ta̍p-ta̍p tih-tih，chiah hō͘我看tio̍h伊查某人ê款。獸醫建議kā縛掉，khah séⁿ bak-bak tak-tak。朋友便若o-ló伊chiah媠，「ná ē boǎi hō͘生？有夠bô chhái！」平平是狗仔，Malukho͘h媠是媠，毋過赤kah bē顧chih，特別是伊咧食物件，絕對bē-sái倚去伊ê碗piⁿ，毋知ê人若 kā sóa碗，抑是去抾落tī 伊碗邊ê食物，無一个無 hō͘咬著傷。A-niau tō bē hiah-nī歹，乖kah。
A-niau ài主人做伴，袂堪lih單獨顧厝，若超過半工，伊會憂愁流目屎，閣較久就會著憂鬱症。一半擺仔放伊孤單，伊會抗議，若無加倍kā惜惜袂紲lih。有一擺，我暗時食pháiⁿ 腹肚，半暝連紲漏幾nā擺，伊就tòe來kho̍k便所門，想講媽媽毋知按怎？顛倒哥哥做伊睏，無問kah半聲。阿媽tiāⁿ講：「A-niau比人較價值，以早ê狗仔to無通hiah hó-khang。伊出門毋捌縛索仔，lóng hông抱tiâu-tiâu，坐車四界𨑨迌，逐工妝媠媠，食好做輕可，袂輸少奶奶，hông惜命命。」阿公嘛bat講：「Tō ài做太平狗，m̄-hó做亂世民。」A-niau hông惜命命，伊 ê相片真正有較chē。
* * *
A-niau佇2007年3月14日出世，陪伴我15年koh 8個gōa月。伊勇敢對抗心臟病ê病痛千thóng工，m̄-bat大聲哀叫haiⁿ-chhan，kan-nā kā我黏牢牢。我若出門超過半晡才轉來，伊會細聲hiⁿ–兩-聲，表示sai-nai。原來動物若有病痛，會家己去揣藥草吃，伊kan-nā ài人陪伴疼惜。2022年12月7下晡，A-niau佇伊bat陪我去做禮拜ê教會對面彼間寵物病院安息。看著伊睏睏á去，我懇求上帝守護伊去kap Oankuh會面。
