Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Tī Pîn-tong ê joa̍h-thiⁿ, thiⁿ-khì chin joa̍h , chhin-chhiūⁿ hóe-lô͘ leh sio, àm-mî bô tiān-hóe, sì-kè o͘-sô-sô, ta̍k-ke chá-chá tio̍h khì khùn.
Goán kui-ke-hóe-á tōa-tōa-sè-sè lóng-chóng gō͘ ê lâng khùn tī chi̍t téng phòa-phòa-nōa-nōa ê bîn-chhn̂g téng, bīn-chhn̂g-té sī iōng kū-sai-sai ê pò͘-pang-á tàu–khì-lâi, goán khùn tī téng koân, kha-chiah-phiaⁿ lâu-kōaⁿ ōe liâm tī pang-á téng, chit khoán kong-kéng si̍t-chāi bô khùiⁿ-oa̍h.
Ba̍k-sat phīⁿ tio̍h chhàu-kōaⁿ-sng-bī, sio-chio lâi thó-chia̍h, khi̍p tī seng-khu-téng piàⁿ-sí chia̍h, hit-sî goán si̍t-chāi lóng khùn bē lo̍h-bîn, a-bú tio̍h kiò goán khí–lâi, múi chi̍t lâng pun chi̍t ki pò͘-tē-chiam, ta̍k ê khai-sí tū ba̍k-sat, in-ūi goán lóng chin ū keng-giām, chi̍t-ē-á kú, ba̍k-sat tio̍h lóng sí-liáu-liáu, keng-kòe chit khoán ê chhia-poa̍h-péng, goán chiah ē-tàng kè-sio̍k hit mê ê khùn-bîn.
Che sī góa gín-á sî-tāi lia̍h ba̍k-sat ê kò͘-sū, ū sim-sek iā ū khó-liân.
