Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎康順添
Chì-bêng tng leh tha̍k chho͘-tiong. Chū in lāu-pē bé chi̍t ki chhiú-ki-á hō͘ i, i ta̍k-kang bô-mê-bô-ji̍t sńg chhiú-ki-á, tiāⁿ-tiāⁿ bô-hûn-ū-thé. Kúi-nā kái, ná kiâⁿ lō͘ ná sńg ki-á, sòa poa̍h lo̍h chúi-kau-á. Ū chi̍t kái, tī siōng-khò ê sî, Chì-bêng thau-thau-á teh sńg chhiú-ki-á, khì hō͘ in lāu-su chang–tio̍h. Lāu-su liâm-piⁿ kiò Chì-bêng ê lāu-pē lâi ha̍k-hāu chhú-lí. Chì-bêng khì hō͘ in lāu-pē kiāu kah chhàu-thâu. Sî-kan chi̍t kang chi̍t kang teh kòe, Chì-bêng kah chhiú-ki-á chhin-chhiūⁿ lián-kheng kah lián-á-phôe, bô hoat-tō͘ thiah hun-khui. Lo̍h-bóe, Chì-bêng ê sêng-chek kán-ná teh chhū-liû-lông, kúi nā kho kiông-kiông beh bô ki̍p-keh. Chì-bêng ê lāu-su chai-iáⁿ tāi-chì tōa-tiâu, kín koh kiò Chì-bêng ê lāu-pē lâi ha̍k-hāu chi̍t chōa, chò-hóe hōe-tâm.
Hōe-tâm ê sî, hú-tō chú-jīm kah tō-su lóng kóng Chì-bêng chit khoán chêng-hêng sī in-ūi sńg chhiú-ki-á ê koan-hē. Chì-bêng ê lāu-pē ti̍t-ti̍t kā lāu-su hōe sit-lé, kóng i ka-tī han-bān kà kiáⁿ. Chì-bêng khòaⁿ tio̍h in lāu-pē sit-bāng ê piáu-chêng, koh siūⁿ tio̍h ka-tī ê sêng-chek chit-má lóng tiàu-chhia-bóe, sim-koaⁿ-thâu kán-ná chiam teh ui, ba̍k sái chhin-chhiūⁿ chin-chu phoa̍h-liān tn̄g sòaⁿ ê chin-chu, ti̍t-ti̍t liàn–lo̍h–lâi. I chhíⁿ-ngō͘, chai-iáⁿ ka-tī bē-tàng koh án-ne. “Góa m̄-thang pháiⁿ-khoán, m̄-thang koh sńg chhiú-ki-á.” Chì-bêng li̍p-chì.
Ha̍k-hāu kah Chì-bêng in tau saⁿ-lî bô kah 5 kong-lí. Hit kang, Chì-bêng chē tī chhia-lāi, hiông-hiông kám-kak kán-ná lâng tī thiⁿ-piⁿ, chhia án-chóaⁿ sái lóng bē kàu chhù. Chhia lāi tiām-chēng kah hō͘ lâng bē chhoán-khùi. Chhia, ti̍t-ti̍t hiòng chiân kiâⁿ, thang-gōa ê kéng-tì kán-ná bô teh tín-tāng. Chì-bêng khòaⁿ tio̍h in lāu-pē, bô-gî-gō͘, i khòaⁿ tio̍h in pâ ê thâu-chang í-keng pe̍h-pe̍h-pe̍h. Chit sî, Chì-bêng ê ba̍k-sái koh liàn–lo̍h–lâi, m̄-koh i kóaⁿ kín kā chhit hō͘ ta, m̄ káⁿ hō͘ in lāu-pē khòaⁿ tio̍h.
Chì-bêng kàu chhù. Pē-á-kiáⁿ lóng bô kóng-ōe. Chì-bêng sûi cháu-ji̍p-khì pâng-keng. I kā chhiú-ki-á koaiⁿ-ki siūⁿ beh kā chhiú-ki-á khǹg tī thoah-á té, chhiú-ki-á soah liâm tī i ê chhiú, bô-lūn i án-nóa pak, án-nóa hiù, chhiú-ki-á mā sī liâm-tiâu-tiâu. Chì-bêng m̄ káⁿ siong-sìn, theh hó͘-thâu-ngeh-á lâi kiāu, kiāu kah ē kho͘ ke bē pûn hóe, chhiú-ki-á iû-goân liâm tī i ê chhiú. Chì-bêng siūⁿ tio̍h í-āu chhiú-bóe lóng ài thóng chi̍t tè, kiaⁿ kah gī-gī-chùn. Hut-jiân, chhiú-ki-á ka-tī khui-ki teh hòng-sàng: “Lí sī chiam, góa sī sòaⁿ, chiam-sòaⁿ éng-oán liâm sio-óa……” Chì-bêng kiaⁿ kah hun-hun sí-sí khì, tó tī thô͘-kha, kui sin-khu tāng kōaⁿ. I ba̍k-chiu thí khui, hoat-hiān ka-tī chiⁿ tī bîn-chhn̂g-kha bē-tín-bē-tāng, chiah chai tú-chiah sī teh bîn-bāng.
Keh kang, Chì-bêng beh khì ha̍k-hāu, i kā chhiú-ki-á khǹg tī thoah-á té. Chì-bêng ê lāu-pē hoah-hiu: “Lí ê chhiú-ki-á bē-kì-tit theh.” Chì-bêng ê chhiú-ki-á ū siaⁿ: “Su-liām sim-chêng bô teh khòaⁿ.” Chì-bêng thiaⁿ–tio̍h, kiaⁿ chi̍t ê cháu ná poe.
