Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Tēⁿ Ngá-hiong
Siūⁿ-khí sè-hàn ê sî-chūn, goán chhù-piⁿ-thâu-bóe ê gín-á sòaⁿ-o̍h liáu-āu, ta̍k-ke lóng ē chò-hóe chhit-thô, chhiūⁿ chhiáng-kha-ke, phah-kan-lo̍k, bih-sio-chhōe, thiàu-soh-á. Ū-tang-sî-á mā ē koàn tō͘-peh-á, lia̍h sì-kha-á. Àm-pn̄g pá, goán mā ē koh chò-hóe chiú tī gōa-bīn ê tiān-hóe-thiāu ē-kha sńg. Hia ū chiok chē bô-kāng-khoán ê thâng-thōa. Siáⁿ-lâng ūn-khì hó, nā lia̍h-tio̍h kim-sek ê kim-ku, ta̍k-ke tō chiok him-siān, bē-su khì khioh-tio̍h pó kāng-khoán. Nā-sī tú-tio̍h hioh-khùn, goán ū-tang-sî-á mā ē khòng-thô͘-iô. Ta̍k-ê gín-á lóng khì khioh thô͘-kak lâi khí-iô, kî-thāi chin kín ē-sái chia̍h-tio̍h sio-thǹg-thǹg koh phang-kòng-kòng ê hang han-chî.
Ká-sú nā tú-tio̍h khah te̍k-pia̍t ê ji̍t-chí, biō-tiâⁿ thâu-chêng tō ē poaⁿ tiān-iáⁿ, pò͘-tē-hì, koa-á-hì. Góa siōng-ài–ê sī koa-á-hì, in-uī hì-tâi-téng teh pān-sian ê sî-chūn, ta̍k-ke lóng ē khia-óa–lâi. Nā khai-sí beh iā mi̍h-kiāⁿ ê sî-chūn, m̄-koán tōa-lâng ia̍h-sī gín-á lóng ē chhun-tn̂g siang-chhiú beh sa téng-bīn iā–lo̍h-lâi ê thn̂g-á, piáⁿ kah gîn-kak-á. Nā-sī lak tī thô͘-kha, ta̍k-ke mā ē kóaⁿ-kín àⁿ-io khì khioh–khí-lâi. Lēng-gōa khòaⁿ-tio̍h tâi-téng sió-tàn iau-kiau ê bô͘-iūⁿ kah thâu-téng ê chng-thāⁿ, bē-su sian-lú hā-hoân kāng-khoán, si̍t-chāi ū-kàu suí–ê. Ián bú-seng ê ián-goân tòe pìn-pìn-piàng-piàng ê lô-kó͘-siaⁿ it-ti̍t leh phaⁿ-liàn-táu, iā sī teh lāng chhiuⁿ. Chit ê sî-chūn hì-tâi-kha ê goán, ta̍k-ke ba̍k-chiu lóng bô tńg-lûn lâi kā in phah-pho̍k-á, ū-kàu cheng-chhái–ê. Chin-chiàⁿ sī “ū chia̍h koh ū lia̍h”.
Ē-kì-tit chi̍t pái, ta̍k-ke kóng beh khì khah hn̄g ê só͘-chāi mō͘-hiám. Goán tō sūn thn̂g-chhiúⁿ ê thih-ki-lō͘ piⁿ, chi̍t-ê chi̍t-ê lóng tòe siōng thâu-chêng–ê kiâⁿ. M̄-chai kiâⁿ gōa-kú, hit ê chhōa-thâu–ê soah bô-tiuⁿ-bô-tî tōa-siaⁿ hoah chi̍t-kù “chhiū-á-téng ū mô͘-sîn-á!” Ta̍k-ê thiaⁿ–tio̍h lóng kiaⁿ chi̍t tiô, kóaⁿ-kín oa̍t-thâu cháu ká-ná poe leh. Chit-má siūⁿ–khí-lâi, góa ê sim-lāi mā sió-khóa kiaⁿ-kiâⁿ.
Sî-tāi kái-piàn ah, chiâⁿ chē chhân-hn̂g piàn-chò lâu-á-chhù, tōa-lâu, kang-tiûⁿ. Kau-thong mā ke chiok lī-piān. M̄-koh ūi-tio̍h an-choân, ē-sái hō͘ gín-á tī gōa-bīn sńg ê khong-kan tō jú-lâi jú-chió. Só͘-í tiāⁿ-tiāⁿ ē khòaⁿ-tio̍h chi̍t-kóa pē-bú the̍h chhiú-ki-á teh io gín-á, ta̍k-ê gín-á tiām chiuh-chiuh lóng bē chhá. Nā-sī kú-tn̂g lâi khòaⁿ, chhiú-ki-á khó-lêng ē hō͘ gín-á sán-seng i-nāi, m̄-nā siong ba̍k-chiu mā ē chō-sêng chi̍t-kóa būn-tê, pí-jû kóng po̍k-le̍k, iú-koái, sek-chêng, poa̍h-kiáu téng-téng. Sīm-chì mā ū sin-bûn pò–kòe, ū gín-á siuⁿ-kòe bê sńg chhiú-ki-á, hō͘ tōa-lâng kā i hān-chè, sòa ín-khí gín-á put-boán lâi thiàu-lâu chū-sat. Che chin-chiàⁿ sī chi̍t-ê ài hó-hó su-khó ê būn-tê.
Sui-jiân chhī-bīn-siōng mā ū bē chin-chē gín-á ê chhit-thô mi̍h-á, m̄-koh chiap-chhiok tāi-chū-jiân ia̍h-sī khì hō͘-gōa ūn-tōng lóng tùi gín-á ê sin-thé kiān-khong chin tiōng-iàu. Mā chin kám-siā chèng-hú chit kúi tang khí chin chē bô-kāng-khoán ê te̍k-sek kong-hn̂g, hō͘ gín-á ū chiok chē só͘-chāi ē-sái chhit-thô. Tōa-lâng nā ū sî-kan, mā ē-tàng chhōa gín-á khì lō͘-iâⁿ, thé-giām tāi-chū-jiân ê súi, thiaⁿ-tio̍h bô kāng-khoán tōng-bu̍t ê siaⁿ. Chhōa gín-á khì chham-ka chi̍t kóa ū ì-gī ê thoân-thé oa̍h-tāng, tùi in ê sin-sim lóng ū chin tōa ê pang-chō͘ o̍͘h!
