Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhongû
Sî-kan kàu chi̍t tang siōng joa̍h ê sî-chūn, thó͘-soāiⁿ-á tng tio̍h-sî. Sio̍k-gí kóng, “Tāi-sú kàu, soāiⁿ-á phi̍t-pho̍k-làu”. Chit sî, goán chng-lāi ê chi̍t tīn gín-á-thûn tio̍h sio-chio khioh soāiⁿ-á. Goán ū lâng phāiⁿ ka-chì-á, ū lâng kōaⁿ iân-tháng-á, kiâⁿ khì soaⁿ-téng thóng chng lāi hit châng siōng lāu ê tōa soāiⁿ-á-chhiū kha, chún-pī khioh soāiⁿ-á.
In-ūi n̂g soāiⁿ-á ê phang-bī si̍t-chāi ū-kàu phang, chhiū téng tio̍h ū chin chōe chiáu-á teh hióng-siū, chhiū-kha iā ū soaⁿ-ku sio-chio lâi thó-chia̍h, goán chit tīn gín-á tio̍h saⁿ-chiⁿ khioh in chia̍h chhun ê soāiⁿ-á, nā-sī hó-ūn ê sî, ū chi̍t chūn hong chhoe–lâi, chhiū-téng ê soāiⁿ-á chiū phi̍t-pho̍k-làu, ūn-khì bái ê lâng, ē hō͘ soāiⁿ-á khian tio̍h thâu, hit-sî tāi-ke tio̍h chhiò kah chhùi-á lī-sai-sai. Tán iân-tháng-á, ka-chì-á, lóng té tīⁿ ê sî, chhēng kûn ê cha-bó͘-gín-á tiōh thián-khui in ê kûn lâi té soāiⁿ-á, ūi-tio̍h beh the̍h khah chē soāiⁿ-á, mā m̄-kiaⁿ lāi-khò͘ hō͘ lâng khòaⁿ.
Chi̍t piàn, ū chi̍t ê a-kong keng-kòe, khòaⁿ tio̍h ta̍k-ke teh khioh soāiⁿ-á, i mā chhiú ngiau siūⁿ beh chò-hóe khioh, m̄-kú bô mi̍h-á thang té, i chiū kā tn̂g-khò͘ thǹg–khí-lâi, ēng chhiū-tîn-á pa̍k khò͘-kha, nn̄g ê khò͘-kha lóng té tīⁿ ê sî, khò͘-thâu pa̍k ân, nn̄g tiâu khó͘- kha phāiⁿ teh keng-kah-thâu, hoaⁿ-hoaⁿ-hí-hí tò–tńg-khì.
Che sī goán gín-á sî-tāi khioh soāiⁿ-á chhù-bī ê kò͘-sū.
