Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯問我敢bat食過水雞？我應講bat食過，真好食，若像雞肉。福伯講，tio̍h是按呢，咱台灣人才叫伊「水雞」（有人寫作「水蛙」）。中國南方幾省mā有食水雞，in叫作「田雞」，福建南方像廈門kah咱仝款漢字寫作「水雞」，但是發音作“súi-koe”。
福伯講，水雞有一項本事tio̍h是，當in tú-tio̍h對敵á-sī beh展風神ê時，會膨風起來hông看起來ke真大隻，事實上刣起來無啥肉。所以咱台灣人才會講「膨風水雞刣無肉（Phòng-hong chúi-ke tâi bô bah）」chit句俗語話。日後，若有人愛kā家己ê體力、能力、財力á-sī權力膨風kah超過伊ê實力真濟，人tio̍h會笑伊是：「膨風水雞刣無肉。」
福伯講：Chit隻水雞真gâu膨風。我講，逐遍台灣若有大選舉，tio̍h會出現真濟隻膨風水雞，m̄ chai福伯是講佗一隻？
福伯笑講，我講ê chit隻水雞最近chiâⁿ chhèng，伊ê名號作趙少康。若beh講趙少康，tio̍h ùi 1994年台北市長選舉講起，當時三个候選人是：中國國民黨ê黃大洲，民進黨ê陳水扁kah新黨ê趙少康。趙少康kā一个地方性ê台北市長選舉膨風kah國家級。伊佇政見發表會講：「今仔日chit場選舉m̄-nā是台北市長ê選舉，實在是中華民國對台灣共和國ê選舉。設使hō͘主張台灣獨立ê陳水扁當選台北市長，中華民國tio̍h會滅亡。」Hit遍陳水扁當選台北市長，中華民國並無滅亡，6冬後ê 2000年，阿扁仔當選中華民國總統，中華民國mā無滅亡，4冬後阿扁koh當選連任總統。若照趙少康ê講法，中華民國至少滅亡3遍去ah。M̄-nā按呢，hit遍台北市長選舉，趙少康講：「陳水扁若當選，外省人攏會hông逼去跳海。」福伯笑講，30冬來無一个外省人hông逼去跳海。每一遍台灣若有大選舉，趙少康攏會恐嚇講：「若hō͘主張台灣獨立ê民進黨贏贏去，中華民國tio̍h會滅亡。」
福伯喘 tōa-khùi才繼續講：2024年台灣總統副總統大選，中國國民黨總統候選人提名侯友宜、副總統候選人提名趙少康。12月初10趙少康講：「中國上蓋掛意ê是台灣ē台獨ah-bē，咱反對台獨，愛kā中國講，中國tio̍h應該表示善意。咱上煩惱ê是戰爭，中國ê軍機軍艦tio̍h mài超越海峽中線、軍機mài koh來se̍h台灣，舞kah台灣人chiâⁿ緊張。」趙少康koh講：「咱面對ê大陸東部戰區，兵源、飛彈tio̍h愛減少，允准咱台灣派軍事觀察員去觀察，確保中國軍事袂威脅台灣。」我插嘴問講：趙少康敢是習近平ê阿公？福伯講，準是習近平ê阿公mā無才調叫人民解放軍tio̍h按怎。
福伯講，膨風水雞siuⁿ-kòe chē。我看，chit句台灣俗語會koh時行一站仔。
