(請安裝Taigi Unicode字形，配合Firefox瀏覽器來讀)
作者：李南衡
五十幾年前，阮二嫂生頭 chiūⁿ 仔查某子，有倩一位小姐來幫忙做月內，滿月了阮二嫂繼續上班，需要人鬥 chhōa 囝仔，hit 位小姐佇阮厝裡鬥相共差不多一年外。有一工伊看阮老母佇拖來門口 ê 路攤仔買菜，阮老母揀一、二十尾丁香，算錢了後，hit 位小姐驚一 tiô 問阮老母：幾尾魚脯仔亦 tio̍h 錢 ò͘？阮老母聽了感覺真奇怪，問伊講：買魚脯仔是按怎免錢？Hit 位小姐講：「佇阮海口，若去鬥 giú 魚網 ê 大索，大人囝仔攏會得 tio̍h 一寡魚仔，阮講是『偎索分魚（óa soh pun hî）』。」
台灣一句歇後語「火燒罟寮──無網（望）ah！」真濟人攏 bat 聽過。「罟寮」是囥地曳網漁撈工作使用 ê 小間厝，曝乾 ê 魚網攏囥佇寮仔內。「罟」是魚網，咱台灣近海 ê 漁村上簡單、上原始 ê 掠魚方式叫作「牽罟」。等魚群當濟偎海岸 ê 時，大索一頭先佇海沙埔固定好勢，細隻魚船載 tio̍h 有縛魚網 ê 大索慢慢出海，那駛那放大索落去海底，差不多駛兩百外公尺遠 ê 時，船 tio̍h 翻頭 sē 轉來，佇 hit 段百五公尺 ê 大索有縛大大 ê 魚網，船駛轉來岸邊才 koh 佇海沙埔固定大索 ê 另外一頭，用按呢放魚網落海底包抄魚群，kā 近偎海底 ê 魚群趕入魚網了後，喝岸邊 ê 人作夥出力 kā 兩條掛魚網 ê 大索 giú 上岸，魚網 tio̍h 漸漸縮偎來。等大索 giú kah 近岸 ê 時 tio̍h 有人 the̍h 大腳竹攏，去 kā 魚網內 ê 魚倒入去竹籠，特別注意 bē 使用手去掠。
等魚攏倒入一腳一腳 ê 竹籠，搬上岸了後，大尾好價 ê 魚另外收起來，khah 細尾抑是 khah 無價 ê 魚仔，隨手分 hō͘ tú-chiah 有鬥 giú 大索 ê 人，大人分 khah 濟 khah 大尾，囝仔分 khah 少 khah 細尾，若是有身大腹肚 ê 會分雙份，比台北捷運頂頭 ê「博愛座」koh khah「博愛」。無管出大力 giú 大索，抑是無啥出力，攏仝款分 tio̍h 魚，所以才會講是「偎索分魚」。
阮老母講，阮干單 bat 聽過「偎索分錢（óa soh pun chîⁿ）」、-bat 聽過「偎索分魚」。Hit 位小姐講，「偎索分魚」是佇現場人人有份，無管你出大力細力，真正是有偎 tio̍h 索 tio̍h 會 tàng 分 tio̍h 魚。你講 ê「偎索分錢」，是頭家特別倩庄內真正有力 ê 大人來鬥腳手，查埔 50 元查某人 30 元，事實上 in 是足有力足出力 ê，並 是「偎索」tio̍h 會 tàng「分錢」。
咱台灣人講做一項代誌有人佇邊仔喝 kah 大細聲，並無出啥力，但是事後伊 mā beh kah 人分好處，咱 tio̍h 講 hit-ê 人是 beh「偎索分魚」。
最近幾十年，台灣漁村人口衰微，古式傳統 ê「牽罟」愈來愈少，有一工真濟台灣人 m̄ 知啥物叫作「牽罟」，當然日後有可能愈來愈少人會曉講「偎索分魚」，抑是「偎索分錢」chit 句台灣俗語話。
李南衡《那teh褪色的台灣俗語話》（1-2冊 )已經出版，歡迎來交關，做伙進步
