(請安裝Taigi Unicode字形，配合Firefox瀏覽器來讀)
作者：林益彰
1.盡磅 ê 芳氣
──致向陽（林淇瀁）
有種詩詞寫著：
阿爸 ê 飯包佮阿母 ê 頭鬃
永遠，攏袂臭酸
閣就好親像是春蕊落地
露水甘願，相陪
2.肥軟 ê 意象
──致陳金順
伊毋是垃儳 ê 文字、
伊毋是腌臢 ê 意象、
伊毋是烏趖趖 ê 芳氣：
彼是咱土地 ê 心事、
彼是咱往擺 ê 心跳、
彼是咱 ê 母親矣
母親 ê 目睭，河溪般 ê 眼神；
3.白雲 ê 塗沙
──致方耀乾
平埔仔姑娘，袂火著心狂
將種佇詩土內 ê 情話
寬寬仔咻喝著，永遠伊
愛來舞出白鴒鷥之歌，
4.江流 ê 聲嗽
──致施俊州
恬靜 ê 火金姑，有心事
白果 ê 向望，土地歌
隨著恬靜，恬恬咧飛，靜靜咧飛
袂怨慼，敢若一葩火佇月暗暝
點明，予稀微毋敢來倚近
5.月光 ê 目睭
──致陳胤（陳利成）
詩人矣，你有看著無，
月光下，無梢聲 ê 月光下
有小小小 ê 火金姑
飛出若深山林內 ê，戀歌聲
6.少女 ê 雨水
──致王羅密多（王永成）
鹽酸草，寫詩予日頭，
日頭開始落雨；雨
彼是透心涼 ê 路，
你 ê 路、阮 ê 路，咱 ê 路
7.綿爛 ê 面相
──致柯柏榮
娘仔豆 ê 火金姑，
佇內籬仔寫出一種春天情，
千百萬張批
經過千百萬年，猶原
彼是若一種母親
徛在塗沙頂 ê 情，盡磅 ê 媠
