◎許隼夫
◆回顧歷史慘痛 ê 傷痕
◆謹記歷史嚴厲 ê 教訓
228了後,國民黨政府繼續高壓統治,實施戒嚴法、白色恐怖;借剿滅匪諜ê名義,將異議分子掠起來,送去火燒島。利用高壓、恐嚇、重刑使人民驚惶,怒不敢言,對社會公眾事務不敢過問,5、60年久。雖然戒嚴法已經解除,政黨也bat輪替,228 kap白色恐怖ê後遺症猶原親像魔影遮蓋台灣人民。總是,咱呣通bo?記得這個悲慘、殘忍ê歷史,咱著不時會記得這個罪惡ê教訓。咱會當赦免,但是毋通放未記得。咱著逐時逐刻記得這個罪惡悲慘ê事實使咱毋通koh再犯這這個錯誤。
◆用愛 kap 饒恕創造希望
今仔日咱來紀念228,毋是beh khioh恨,毋是beh報復。咱著化悲慟為力量。咱著用愛心來赦免,除去咱心中ê怨恨,將歷史ê傷痕包起來。合力用相愛、尊重、合作kap包容來相對待。用和平來聯合原住民、客家人、河洛人、國語人和睦相處。大家做伙來覺醒,來學習放棄中國文化ê àu步,撿回台灣人老實、勤儉、相愛、互助ê精神。合力來重新恢復台灣人ê心靈kap文化,做伙來創造台灣光明ê未來。
◆以公義和平改變台灣
228紀念碑kap 228紀念館佇台灣逐所在攏建立起來。228記念ê主題是「公義和平」。這擺台灣總統大選,蔡英文也用「公平正義,改變台灣」做競選訴求。今仔日咱做伙來記念228,希望重新建設台灣ê未來。咱愛志願對咱家己做起,佇咱ê家庭、社區中做到mài怨恨、mài歧視、mài批評、mài傷害,互相包容、尊重異己。用愛心、持公平,好公義、愛和平來起造家己ê心靈,使台灣人佇世界上成為一等公民。大家做伙打拚來建造咱ê故鄉台灣,通佇世界上成為一個新koh獨立ê國家。願咱逐人所信ê神,施恩賜福咱ê故鄉台灣。
(作者為退休牧師,本文為今年休士頓228紀念會短講詞)