◎李南衡
早前台灣ê囝仔若teh相爭一項物件，相爭ê若m̄ 是家己ê，一般有理解ê父母序大攏會教示家己ê序細講：「家己ê家己好，別人ê生蝨母。」（Ka-kī ê ka-kī hó, pa̍t-lâng-ê seⁿ sat-bó.）教家己ê囝仔m̄ -thang貪心想beh霸佔別人ê物件，若是硬beh愛別人ê物件，頭殼會生蝨母，用按呢來嚇驚囝仔。
生tī人頭毛內底ê蝨蟲台語叫作「蝨母」，m̄ -nā會hō͘人真癢（chiūⁿ），mā是傳染病ê媒介，早前台灣衛生習慣猶未普遍以前，真濟台灣人，特別是長頭毛ê查某囝仔頭毛內會生蝨母。事實上，生蝨母完全是清潔衛生ê問題，kah佔有別人ê物件根本無關係，但是生蝨母是真討厭ê代誌，囝仔聽tio̍h序大人按呢講，確實有收tio̍h遏止ê作用，khah m̄ 敢數想佔有別人ê物件。
會記得戰後我讀小學ê時，有真濟女同學頭毛生蝨母，m̄-nā會傳hō͘ in住仝厝裡ê親人，就是kah同學朋友做夥thit-thô ê中間，蝨母mā真有可能會傳來傳去。會記得有大人作謎猜hō͘阮臆，其中有印象khah深ê兩個，一個是「死bē臭」、一個是「大不孝」。「死bē臭」ê謎底是「蜂」（phang），「蜂」死了叫作「死蜂」（sí-phang），「蜂」kah「芳」仝發音，所以講是「死bē臭」。刣老父都真不孝ah，何況是「刣」老母──「殺」（sat）「母」（bó）咧？當然是「大不孝」，「殺母」kah「蝨母」取in仝音。會tàng the̍h來作謎猜ê程度，咱tio̍h知影生蝨母tī我作囝仔ê1940年代是偌呢普遍ê現象。
讀中學ê時開始有美援，內底有一項用tī公共衛生就是提供真強ê殺蟲劑“DDT”，差不多全台灣四界攏噴“DDT”。伊會刣死一大堆咱所講ê「歹蟲」，但是mā同時刣死一大堆咱所講ê「好蟲」，伊ê功過真oh評斷。因為“DDT”ê噴chōaⁿ，hō͘ Maralia（瘧疾）蚊仔tī台灣絕種，今仔日台灣是世界上真少數Maralia絕跡ê國家之一。Hit當時中小學ê查埔囝仔攏mā一粒剃kah金金金那像西瓜，無生蝨母ê問題。全台灣中小學校ê查某囝仔一班一班、一個一個來，坐tī教室外面，老師夯一枝chōaⁿ蚊仔水hit種chōaⁿ仔，內底貯“DDT”粉，tī女同學ê頭毛chōaⁿ chōaⁿ一下，隨時緊用一條大條布巾ho̍p leh包密密，差不多規半點鐘了後才tháu開，叫in轉去厝裡才kā頭毛洗清氣。講mā誠神奇，那像自hit陣了後tio̍h m̄ – bat聽講啥人頭鬃生蝨母。Kah Maralia仝款，蝨母tī台灣mā完全絕跡。
今仔日，你若勸囝仔講：「家己ê家己好，別人ê生蝨母。」21世紀ê台灣囝仔真有可能問講：「蝨母是啥？」續落才問講：「蝨母beh按怎生？」完全m̄ 知你teh講啥！
