台南市永華國小台語詩 指導老師：陳惠雅
春天佇佗位
◎白昕睿（6年1班）
春天佇佗位 我去問蝶仔
蝶仔講花蕊生足媠 叫我去問花蕊
春天佇佗位 我去問花蕊
花蕊講蜜蜂咧揣伊 叫我去問田嬰
春天佇佗位 我去問田嬰
田嬰講鳥仔飛較緊 叫我去問鳥仔
春天佇佗位 我去問鳥仔
鳥仔講種子上好食 叫我去問種子
春天佇佗位 我去問種子
種子颺颺飛 原來春天四界是
春天佇佗位
◎張明翰（6年5班）
春天佇佗位 我去問花蕊
花蕊講伊咧啉水 叫我去問籤詩
春天佇佗位 我去問籤詩
籤詩講伊咧解謎 叫我問家己
春天佇佗位 我問我家己
我向頭看水池 池仔內有一个少年注神咧看我
伊對我微微仔笑 原來 春天就覕佇少年仔青春ê面
春天佇佗位
◎曾翊倫（6年3班）
春天覕佇芳芳ê花蕊內底
春天藏佇燒烙ê日頭光中間
春天坐佇鳥仔ê翼股頂
春天共塗跤ê蟲豸叫精神
春天佮暗暝ê天星閃爍做伴
春天佇囡仔ê笑聲中覕相揣
春天佇佗位
◎莊羽倢（6年3班）
春天ê風有時大有時細
春天ê天氣有時寒有時熱
驚蟄後冬眠ê動物一隻一隻精神
春天佇阮ê校園內咧選美
春天ê花蕊有足濟無仝ê色緻
花園內ê花莓一葩一葩咧發穎
春天ê氣味藏佇逐个所在
春天當咧等你等我來揣伊
伊講欲𤆬咱做伙欣賞這个美麗ê城市
