Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
La̍k-cha̍p nî chêng góa chhut-sì tī Pîn-tong chng-kha ê chhân-chng só͘-chāi. Hit-sî goán-tau chin sàn-chhiah, bô tiān-hóe thang ēng, ài ēng iû-teng, chhù-téng khàm kam-chià-hâ, piah sī tek-pín-á kô͘ thô͘ chò–khì-lâi ê, só͘-í, hó-chhù sī joa̍h-thiⁿ khah thong-hong, bái-chhù sī sai-pak-hō͘ nā piàⁿ–lâi ê sî, chhù-lāi tio̍h chò-chúi-chai.
Goán chng-á-thâu hiah-nī chōe lâng, kan-ta ū saⁿ keng sái-ha̍k-á thang ēng, in-ūi chá-sî khiâ thí-bé kàu ha̍k-hāu ài chit-tiám-cheng kú, só͘-í tio̍h ài pí pa̍t-lâng khah chá khì hō sái-ha̍k-á ūi. Hit-tong-sî ê chng-kha, ōe-seng khah bái, thiⁿ phah-phú-kng ê sî thiⁿ iáu tām-po̍h-á àm, khì sái-ha̍k-á hia bô-tiuⁿ-tî, ê-á ta̍h tio̍h sái. Hó-ka-chài hit tong-sî ta̍k-ê lóng thǹg-chhiah-kha, chit-khoán put-hēng ê sū-kiāⁿ khah hó chhú-lí, siōng kiaⁿ sī lo̍h tōa-hō͘ ê sî, in-ūi pâi-chúi bái, chúi-pûi sì-kè lâu, khí sái-ha̍k-á tio̍h ái ēng liam–ê, che chin-chiáⁿ sī chi̍t tiûⁿ ok-bāng, hit-chūn ê góa kám-kak khah-su chi̍t chiah ē-tàng chū-iû phàⁿ-phàⁿ-poe hô͘-sîn, it-ti̍t kàu-taⁿ, ū-sî góa iáu ē chòe chit khoán ê ok-bāng.
