Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯講，「拍人喝救人（Phah-lâng hoah kiù-lâng）」chit句台灣俗語話是講一个無講道理ê施暴者，拍人顛倒誣賴人拍伊koh喝救命。我問講，世間ná有chit款人？福伯笑講，當然有。舊年（2023年）10月佇以色列有人拍人喝救人喝kah足大聲，你ná-ē無聽tio̍h？
福伯講，舊年10月初7透早，哈瑪斯發動「阿克薩大水行動」，ùi加薩走廊ǹg以色列發射3000外粒火箭彈，仝時約略有2500名哈瑪斯武裝分子突破隔離牆圍偷拍加薩周邊ê以色列地區，而且佇邊仔ê猶太集體農莊屠殺平民，koh偷拍以色列國防軍ê軍事基地。有1400个以色列人kah外國公民tī 10月初7ê偷拍中死亡，其中雷姆音樂節大屠殺tio̍h有260人hông刣死。上少有200名以色列平民hông劫去加薩作人質。超過44個國家kā chit遍ê偷拍事件看作是恐怖攻擊。以色列當然真受氣，一開始頭六工tio̍h投6000粒炸彈。10月初9，以色列全面封鎖加薩走廊，切斷彼所在ê食品、水、電kah燃料供應，koh khah hông煩惱人道主義ê危機。10月27，聯合國大會投票，絕大多數國家呼籲tio̍h隨時實行人道主義停火。是按怎無法度停火？
福伯講：Tī chit場戰爭到今年（2024年）4月初6滿6個月。至少有3萬2000个巴勒斯坦人死亡，加薩走廊居民迫切需要援助，同時猶有數十个以色列人hông當作人質扣押佇加薩。真濟國家攏呼籲加薩tio̍h停火，以色列要求，人質若無放轉來免講，哈馬斯堅持扣押人質來作談判ê kho-jí-á。所以加薩停火kah釋放人質ê談判，一直無法度取有突破性ê進展。
福伯講：咱作囝仔ê時陣bat去灌杜猴（杜伯仔）。咱明知杜猴藏佇土孔內底，咱tio̍h用水灌入孔，直直灌，無偌久杜猴tòng-bē-tiâu，tio̍h拚命chông出來。福伯講，以色列ê軍隊攻入去加薩走廊北部，當地人民死傷bē少，聽講哈馬斯分子是攏bih入去地道內底。哈馬斯佇加薩走廊所起造ê地道聽講有1300條，tàu起來有4公里長，chit條接hit條，你無tè chhōe人。以色列想beh用咱作囝仔灌杜猴ê方法，引海水灌入地道，迫哈馬斯分子chông出來投降。過頭殘忍，全世界攏極力反對！哈馬斯若猶有人活tio̍h，哈馬斯tio̍h家己認為無完全輸。
哈馬斯四界哭哀以色列按怎入侵加薩走廊，偌濟囝仔死亡，偌濟人枵餓，偌濟無辜ê人民死佇砲火下面。全世界真濟人同情加薩走廊人民，特別是一寡穆斯林國家大大攻擊以色列，甚至有砲火拍以色列，假那替天行道。攏無問講啥人先出手偷伯人、偷掠人去作人質。干單聽tio̍h拍人喝救人ê聲音無公道。
