(請安裝Taigi Unicode字形，配合Firefox瀏覽器來讀)
作者：蘇晏德
九月初一記者節Káu-goe̍h chhe-it kì-chiá-cheh
無論日時抑暗暝Bô-lūn ji̍t–sî ah àm-mê
毋管風雨抑落雪M̄ -koán hong-hō͘ ah lo̍h-seh
重大新聞走若飛Tiōng-tāi sin-bûn cháu ná pe
記者任務真重要Kì-chiá jīm-bū chin tiōng-iàu
專業智識愛會曉Choan-gia̍p tì-sek ài ē-hiáu
頭腦清楚有絕招Thâu-náu chheng-chhó ū choa̍t-chiau
內容充實閣有料Lōe-iông chhiong-si̍t koh ū liāu
記者採訪足辛苦Kì-chiá chhái-hóng chiok sin-khó͘
毋管透風抑落雨M̄-koán thàu-hong ah lo̍h-hō͘
新聞報導袂耽誤Sin-bûn pò-tō bē tam-gō͘
趕緊放送來傳播Kóaⁿ-kín hòng-sàng lâi thoân-pò͘
記者工課誠趣味Kì-chiá khang-khòe chiâⁿ chhù-bī
特定採訪講台語Te̍k-tēng chhái-hóng kóng Tâi-gí
報導美食佇夜市Pò-tō bí-si̍t tī iā-chhī
親像明星上電視Chhin-chhiūⁿ bêng-chheⁿ chiūⁿ tiān-sī
