(請安裝Taigi Unicode字形，配合Firefox瀏覽器來讀)
【編按 ：〈宗教裁判大審判官〉是19世紀俄國作家杜斯妥也夫斯基（Fyodor Dostoyevsky，1821～1881）《卡拉馬助夫兄弟們》ê第5章。耶穌以少年人ê形象出現佇一個小庄腳，施行一個神蹟。宗教裁判大審判官（教會ê大主教）雖然知影伊是耶穌，卻命令人掠伊入烏暗ê監牢。耶穌，會怎樣受大審判官ê審判呢？對今仔日ê讀者來講，這個故事猶原有真濟值得思考ê所在。】
◎譯者：陳柏壽
有一日，耶穌恬恬出現佇一個小庄腳，佇一位死去ê7歲查某囡仔面前，老母kap眾人攏leh哭。耶穌出現ê時，m̄ 知是按怎，人人攏知伊是耶穌，因為人攏感覺著伊ê心肝有火kap愛ê太陽。耶穌伸出伊慈悲憐憫ê聖手，將已經死去ê查某囝救活。全街路ê人攏歡喜跳舞，唱Hosannah！Hosannah！
大主教就是大審判官，遠遠看，對頭看到尾，尤其是細漢囡仔對棺柴坐起來ê時，大主教ê表情真歹看。伊就命令人掠耶穌入烏暗ê監牢。
彼暗，大主教一個人去監牢，chhōe耶穌講話：
「你怎樣koh轉來？你豈m̄ 知你koh轉來增加阮真濟麻煩？」（耶穌攏無講話）
「你無應該koh轉來地上行神蹟，無應該佇今仔日koh講話。你古早以前行過ê神蹟、講過ê話攏已經有夠額。你今仔日欲繼續講話行神蹟，明-á-chài我就當你做異端，燒你佇木柱頂！我嘛kā你保證，hiah-ê今仔日唱歌謳咾你、唚你ê腳ê人，會佇你面前加柴、添火，hō͘你痛苦加添。親像刑一個異端ê犯人按呢。」
（這個犯人耶穌恬恬看伊，但是無應話）
「你kā人講：我賞賜恁自由。（大審判官teh笑，了後koh講）你豈無看著，chiah-ê『自由人』已經攏將in ê『自由』謙卑奉獻佇我ê腳前啦！今仔日雖然所有ê人，高低ê人、好額散，親像海砂hiah-ni̍h濟，攏認為in有自由──對你來ê完全ê自由──但是chit-má，攏將in ê『自由』獻佇我座前。Chiah-ê獻hō͘阮ê自由，豈m̄ 是就是你teh講ê自由呢？」
人本來受造就有背叛ê性質，阮收拾你所留ê重擔，就是照你ê吩咐：你有應允，『著照你ê話，建立你ê國度；阮所捆縛ê，你嘛欲捆縛；阮所釋放ê，你嘛欲釋放。』但是你來，想欲對阮取回這個特權是無可能啦！你今仔日來這世間，只有是增加阮ê困擾。」
「豈有影撒但佇曠野『試探』你？撒但ê大靈所提出ê三個問題，其實是人性過去、現在kap將來，未解決ê所有ê問題kap矛盾，世間人無人有法度增加或減少其中任何矛盾。但是阮地面chiah-ê人：教會、祭司、學者、哲學家、政治家kap詩人，集中起來，阮有法度解決chiah-ê問題kap矛盾。」
「第一個問題：將石頭變餅hō͘人肚腹bē枵（iau）。人ê嘴一定會kā你講：除了『枵餓』以外，世間ê所有ê罪惡、犯罪，攏無存在啦！先hō͘ in有飯食，然後才叫in守道德！你答應in有自由，但是你無hō͘ in有抵抗枵餓ê自由！但是阮有權勢，用你ê名養飼in。In不但仆拜阮，答應欲做阮ê奴隸，koh答應阮kap in做伙，欲起造未來世界新ê巴別塔。自由kap麵包bē-tàng共存。本來人類攏認為你會當將chiah-ê石頭變餅，才來kun-tòe你，結果in知天頂ê麵包是食bē飽ê啦！」
「你拒絕伊ê第一要求，因為你認為用麵包換來ê自由，m̄ 是真正ê自由。曠野ê魔鬼嘛知影，就是這點，伊有法度克服你；嘛因為這點，人人攏來仆拜佇這位曠野魔鬼ê面前。」
「人類知影in是軟弱、無尊嚴、反抗、頑固、歹教。只有阮有法度供給in ê需要，克服in ê背叛，對付in ê問題。阮對付in ê時，逐日攏借用你ê名，做chiah-ê代誌，阮kā in講：『阮是上帝ê僕人，阮是上帝地面ê代理人。』阮按呢講，是因為你迫阮講白賊，阮嘛知阮是teh講白賊，這嘛是阮ê困境：阮用你ê『名』，供給in地面ê餅，m̄ 是天頂ê餅。經過按呢，阮才有法度建立地面ê巴別塔。阮用你ê名管轄in，實際上，阮已經變做in ê神明，只有阮ê教會才是in崇拜ê對象。這就是阮無愛你koh出現佇世間ê原因。」
「人類需要一個崇拜ê所在kap崇拜ê團體，in若無聚集做伙崇拜，就bē安心。這邊有這邊ê神，彼邊有彼邊ê神，阮來攻擊in ê神，in來攻擊阮ê神。教會soah變做人類hō͘相廝殺ê所在。有歷史以來這是人類ê不幸。有一日世間ê神明攏消失以後，人類會繼續mo̍h著in家己ê偶像，繼續戰爭。因為偶像hō͘ in感覺有神蹟，親像hō͘石頭變餅。」
「照你所知，人性神祕ê所在m̄ 是在佇伊會當生活，是在佇伊追求一個固定ê「對象」，hō͘ in會當『為著什麼』來活。In leh chhōe一個『目標』kap『偶像』來活，chhōe會當將in天生ê自由，送出去ê對象。這是人間所有痛苦ê來源。」
「你hō͘人間受苦，原因在佇你賞賜in有自由意識，有選擇ê自由。你不斷增加in選擇ê自由，hō͘人間愈大ê自由，最後，人甚至會將你ê面形毀掉，棄捒你ê道理。In為你愈hō͘ in有選擇ê自由，愈增加in心靈混亂kap痛苦，無法度解決ê問題愈濟。自由變做人生ê that礙kap宿命。」
「撒但第二個挑戰就是『神秘主義』：因為相信你若對塔頂tiô落去，上帝會差遣天使扶你ê身軀。你將chiah-ê神秘主義除去，留hō͘世間人家己佇心內推磨、不安、戇愕、迷惑。你不但無帶世間入去神秘主義ê世界，反轉選擇hō͘人釘死佇十字架頂。這是世間人無法度了解、無法度諒解ê代誌。你按呢做，親像你無愛in，增加in永遠ê痛苦。你ê十字架代表你毀壞你家己ê國度ê基礎，你家己愛負責。」
「你放棄神蹟、神秘主義以及萬國ê榮華權勢――這三項應該是對付chiah-ê叛徒上好ê人間武器──你無欲用，反轉用你ê十字架，hō͘ in笑講：『你若是上帝ê囝，著對十字架頂落來！你若落來，阮就信你！』你知影，你若真正對塔頂tiô落去，你是leh試探上帝，同時也是你失去對上帝ê信心。你若是真正對塔頂tiô落去，曠野ê魔鬼心內會真快樂。但是你無按呢做，你豈知地面億萬痛苦眾生，因為按呢，失去in人生ê方向kap希望！？」 （待續）
