(請安裝Taigi Unicode字形，配合Firefox瀏覽器來讀)
【編按 ：〈宗教裁判大審判官〉是19世紀俄國作家杜斯妥也夫斯基（Fyodor Dostoyevsky，1821～1881）《卡拉馬助夫兄弟們》ê 第5章。耶穌以少年人 ê 形象出現佇一個小庄腳，施行一個神蹟。宗教裁判大審判官（教會 ê 大主教）雖然知影伊是耶穌，卻命令人掠伊入烏暗 ê 監牢。耶穌，會怎樣受大審判官 ê 審判呢？對今仔日 ê 讀者來講，這個故事猶原有真濟值得思考ê所在。】
◎譯者：陳柏壽
前情提要：有一日，耶穌恬恬出現佇一個小庄腳，行神蹟 hō͘ 一個囝仔復活，卻被掠入監牢受宗教裁判大審判官ê審判……
「你豈 m̄ 知人間若是放棄神蹟 kap 神祕主義，就是放棄上帝，就 in 會去 chhōe in 家己 ê 神蹟 kap 神祕主義，in 家己會創造in家 己ê 神蹟。人 ê 一生就是不斷追求神蹟 kap 神祕ê本能，所以坫神（tiam-sîn）、卜卦、行巫術、行冒險。」
「你無愛奴化人心，你愛人有良心 ê 自由，所以你無愛用神蹟束縛奴隸。但是你對人ê評價siuⁿ高，你對人 ê要求 siuⁿ 濟，因為 in 是奴隸，加上 in gâu 反叛。你看，1500年以來，有什麼人達到你 ê 標準無？Chiah-ê 人佇阮面前反叛阮，感覺真得意，但是阮攏看in親像學校ê小學生，無端作亂nā-tiāⁿ。」
「阮已經掌握該撒ê刀劍，因為有伊 ê 刀劍，阮不得不放棄你。野獸會爬來阮身邊，唚阮ê腳，用伊帶血 ê 目屎，來奉待阮。阮會坐佇野獸ê身上，舉起阮 ê 杯，杯頂有刻彼字『神祕』做阮ê記號。彼時世間就有和平 kap 幸福。」
「阮知世間猶原有強者，也就是你所揀選ê。但是 chiah-ê 強者有一日嘛會因為等待你 ê 來臨，等到擋 bē tiâu，心神厭倦，最後會加入其他陣營，夯起反抗你ê大旗。」
「In 有這款行動，就是你 hō͘ in有自由。阮 kā in 講：恁若放棄恁 ê 自由，一切順服阮，就天下太平。無論阮對 in ê 要求是對或不對，最後 in 一定相信阮是對 ê，因為in若想著過去做奴隸 ê 日子，心靈混亂 ê 過去，in 寧可來歸倚阮，帶著in ê自由、自由思想 kap in ê 科學來阮面前，寧可有阮ê神蹟kap神祕主義。Chiah-ê人，強者、弱者、有錢人、散赤人，攏會仆拜阮ê腳前，講阮正是對ê，因為阮擁有你ê神祕。」
「所以我勸你，m̄ 通對人類期待siūⁿ濟，因為你已經為in放捒你ê生命，你已經愛in夠額，就到此為止tō好，m̄ 免對人類期待過分，若無，你對人類ê失望會無限增加。」
「阮供給 in 食 ê 餅，chiah-ê 餅，實在是 in 家己 ê 手做 ê 餅。阮對 in ê 手收來 ê 餅，koh 送 hō͘ in 食，實在 m̄ 是什麼奇蹟。In 雖然知影阮並無將石頭變做餅，但是 in 對阮領受著 in ê 餅，感謝阮比對感謝餅 khah 深。In深知『完全順服』阮 ê 命令，是何等 ê 幸福啊！In 歸群來順服阮以後，tō bē koh 四散，bē 流浪曠野。按呢阮就有法度教育 in，hō͘ chiah-ê 動物享受 in 謙卑 ê 幸福。」
「阮 hō͘ in ê 教育就是 hō͘ in 知：in 不過是軟弱ê動物，in 無值得什麼，in bē 使驕傲，就按呢 in 就會倚近阮，親像雞仔囝倚佇雞母身邊，阮若生氣，in 就驚到 phi̍h-phi̍h-chhoa̍h，真緊會流目屎；但是這種狀態隨時會過去，in ê 驚惶隨時會變做歡喜快樂，真緊會親像囡仔按呢唱歌跳舞起來。」
「阮雖然知 in 不過是脆弱、軟 chiáⁿ、反抗、無助、容易犯罪，但是阮會容允 in 去犯罪。阮 kā in 講：『罪真緊就會過去，有阮ê允准，罪就m̄ 是罪。』阮允准 in，因為阮愛 in。阮 kā in 講：阮允准 in 犯 ê 罪，chiah-ê 罪攏歸佇阮。按呢 in 就敬慕阮、崇拜阮，當阮做 in ê 救主，因為阮擔當 in 佇上帝面前ê罪。佇阮面前，in 完全無家己 ê 祕密。」
「你無欲接受魔鬼所應允ê第三條件來接受『天下 ê 榮光、富貴、權勢』，阮就按呢起來接受天下 ê 榮華、富貴 kap 權勢。」
「阮就是一個神祕主義ê集團，對羅馬教皇、主教、牧師以及所有基督教分派ê宗教人，攏是阮集團 ê 分子。阮 ê 存在 m̄ 是偶然，是古早以來就設計好勢，為著欲保存這項無人會當探險ê神祕主義ê領土。」
「In 人生最大 ê 掙扎 kap 痛苦就是 in ê 良心，但是阮會 hō͘ in 有全然好 ê 答案。阮講 ê 任何 ê 話 in 攏會相信，攏會解除 in 做決策 ê 時所有 ê 憂慮 kap 痛苦，一直到 in 入墓地為止。阮會不斷供應 in 天堂 kap 永活 ê 福音，in 就會按呢平安轉去。」
「雖然你應允你欲再臨，帶著千軍萬馬，救贖屬佇你 ê 一部分 ê 人，但是阮 kā in 講：阮有法度救贖『全部』 ê 人類。啟示錄有預言彼個淫婦騎佇朱紅色 ê 獸，手寫『神祕哉！』 ê 記號，最後會千千萬萬 ê 信者，將這位淫婦剝到赤身露體。彼時阮會 khiā 出來，為 chiah-ê 千萬弱者講話，阮已經擔當 in 所有罪過。阮 kā 你講，阮嘛有經驗過曠野食草蜢、食樹根ê艱苦，阮嘛努力欲加入 hiah-ê 受揀選 ê 族群，hō͘ 阮嘛會當補填hiah-ê 『不足 ê 數目』。」
「但是阮無法度按呢做，阮回歸到千千萬萬 ê 謙卑 ê 靈魂身邊，為著 hiah-ê 人 ê 幸福。阮 ê 勢力一定隨日增加。我 koh 講一遍：Bîn-á-chài 你會看著這群謙卑 ê 人，聚集你ê面前，點著扁柏木ê柴，我欲 kā 你燒佇火柱頂，因為你來阻擋阮ê事工。無人會比你 khah 值得火刑。Bîn-á-chài 你一定 tio̍h 死。」
「這是我講 ê 話。」
大審判官停止講話，伊看犯人對頭到尾攏真注神 teh 聽，目神真溫和，伊 teh 等待這位犯人 ê 回應。
這位老大審判官真希望聽著耶穌講話，就是講出伊 siōng 無佮意 ê 話、siōng 反對伊 ê 話嘛好……
但是耶穌佇 hia，攏無應話。
忽然間，耶穌恬恬 khiā 起來，輕輕仔 kā 主教無血色 ê 嘴脣唚一下，做伊 hō͘ 主教 ê 一個回答。
主教無預料耶穌會按呢做，伊變做真無頭神。
主教行到監獄 ê 鐵門，kā 門開–開。
最後，大審判官命令耶穌緊緊出去，bē 使 koh 轉來。
耶穌佇烏暗 ê 小巷中行出去，伊ê形影消失佇烏暗 ê 巷仔口。
耶穌 ê 唚嘴，佇大主教心中引起一陣漣漪。但是大主教心中 ê 思想，猶原無改變。
