Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀
◉蔡榮信
A-bú ê thiàⁿ chhin-chhiūⁿ tn̂g-lâu chúi, lí kā goán chèng tī khe-chúi piⁿ, ǹg-bāng goán chá ji̍t kín khui-ki hoat-íⁿ, hō͘ goán hoe-lúi phang, kóe-chí tiⁿ, pêng-an tōa-hàn ē-tàng chhut-thâu-thiⁿ.
A-bú ê thiàⁿ chhin-chhiūⁿ teh chhiah-siù, lí kā goán khǹg tī lí sin-piⁿ, kòa-sim kiaⁿ kiáⁿ-jî āu-bóe m̄ chiâⁿ-iūⁿ, sòaⁿ-thâu sòaⁿ-se sòa kat kui-kiû, khó͘-sim tán-thāi chit pak súi tô͘-iūⁿ.
A-bú lí ê chhiú-lō͘ chin-chiàⁿ iù, tiām-tiām kā goán sioh kā goán siù, chiam thoa sòaⁿ, goán sim-koaⁿ leh tiuh-tiuh-tōaⁿ, bô-oàn bô-thàn chhiâⁿ goán tōa-hàn, ǹg-bāng Siōng-tè tàu-tīn lâi siù bāng.
A-bú ê thiàⁿ sī siōng-súi. lí bô-mê-bô-ji̍t kā goán chiàu-kò͘, sûi-sî hòng-sàng leh chio-ho͘.
A-bú ê ōe sī siōng-súi, chhin-chhiūⁿ àm-mî khé-bêng-chhiⁿ, chi̍t pha chi̍t pha teh kā goán chhiō-lō͘, hō͘ goán chi̍t lō͘ bô bê-lō͘, it-seng tè Chú kha-pō͘.
A-bú goán beh kám-siā lí, goān Chú sù-hok lí pêng-an hoaⁿ-hí.