對一个浮佇尼羅河水 ê 紅嬰仔講起

(請安裝Taigi Unicode字形,配合Firefox瀏覽器可閱讀)

作者:陳柏壽

來世間拄著風湧真濟,親像詩人按呢講,人生就是親像欲拄著「大湧若山蓋落來,大風猖狂若哮獅。」(台語聖詩 582 首)我 bat 去過埃及 ê 尼羅河,看河面真闊親像海。人講大河內不但有真濟菅芒野草,水內閣有兇惡 ê 鱷魚,隨時準備欲食人。

希伯來人 ê 查某囝,就是摩西 ê 老母,欲生囝 ê 時陣,埃及王法老有命令講,若是看著紅嬰仔是查甫 ê,著 kā 伊殺死。摩西 ê 老母生囝了後,藏佇身邊已經三個月,無法度閣藏啦,因為法老 ê 命令真嚴,最後姑不二將,就用尼羅河邊 ê 蘆葦,沃石油 kap 打馬膠,做一个會當擋水 ê 箱仔,將此个三個月 ê 紅嬰仔,囥落去尼羅河 ê 大水。

這真正是一个斷腸 ê 時陣,目睭金金看家己生 ê 囝,隨兇惡 ê 尼羅 ê 大水浮去。Kah hit-tang-sî 唐山老母送囝坐竹排仔浮入黑水溝,一步三回頭,十去九不回,去到台灣生死不明 ê 情景,完全仝款。

佇歷史上,上帝咧救人,咧改換歷史,就是佇世間攏看無希望,攏無出路 ê 時陣,是佇人 ê 性命茫茫渺渺,親像一氣絲仔就欲斷氣 ê 時,上帝才出現,歷史才改變。這是基督教 ê 攝理。上帝派法老 ê 查某囝到尼羅河邊洗浴,忽然看著河頂面浮來一个紅嬰仔,紅嬰仔佇蘆葦做 ê 箱仔內面 háu!上帝激動法老 ê 查某囝 ê 愛心,toh 將紅嬰仔 khioh 轉來,閣叫一个希伯來 ê 奶母,chhàu-tú-khám 伊就是摩西 ê 生母,來 kā 伊 io。法老 ê 查某囝認摩西做囝,kā 號名「摩西」,意思是「伊是對水中 khioh 轉來 ê 囝」。真濟台灣人嘛是仝款,是對烏水溝大海頂 khioh 轉來 ê 囡仔。

摩西有二个老母:一个是埃及人晟伊大漢 ê「養母」;另外一个是生伊到三個月為止,kā 囝放水流,一世人 m̄ 捌有印象 ê kā 伊飼奶 ê「生母」。彼个埃及人 ê 養母,不但好好栽培、訓練、教養摩西,予伊變做全埃及 ê 勇士,閣予伊有地位、權力 kap 自由。雖然是按呢,佇摩西心靈 ê 深層,一直留著伊希伯來 ê「根性」,伊永遠無離開伊 ê 老母 ê 根,永遠會記得伊是「外口人」。佇伊 ê 生涯中,雖然有享受埃及養母 ê 權勢,但是伊一直屬佇伊家己生母 ê 民族,伊時時看著伊 ê 民族哀哭 ê 目屎。摩西 ê 權勢 kap 地位 ê 後面,就是揹著伊整个民族做奴隸 ê 重擔。

有一擺摩西看著二个埃及人欺負希伯來人,伊看四邊無人 ê 時,伊就起手 pha̍h 彼二位埃及人。聖經講摩西 m̄ 是一位真傑出 ê 領袖,講伊是一位真平常 ê 人,但是伊起性 pha̍h 死人嘛是會。上帝佇著火 ê 莿帕中出現予伊看 ê 時,摩西只有叫百姓著安靜、安心聽候上帝。但是伊本人嘛一直問上帝,我是啥物人,有啥法度承擔這項重任?(出埃及記 3 章 21 節,4 章 10 節,6 章 30 節)伊是一位真謙卑 ê 人。

希伯來人一直到摩西 chhōa in 出埃及,攏總做人 ê 奴隸 400 冬。摩西 chhōa 差不多 60 萬个男女老幼,流浪佇西奈沙漠 40 冬久,每工食天頂落來 ê 嗎哪為生。

濟濟台灣人對黑水溝過台灣,受著外來 ê 黑官、貪官、殖民官 ê 壓迫,受著欺負、剝削,就是 kap 佇埃及 ê 希伯來人仝款,做台灣 ê 農奴,差不多嘛做 400 冬久。台灣人受台灣 ê 「法老」 ê 壓迫久長 ê 歷史中間,當然有濟濟人無顧家己性命,勇敢衝出去反抗 ê 人,但是遮 ê 人 ê 名攏埋佇土底,咱無法度知影 in ê 名字。主因是咱到今猶無出一个台灣 ê 摩西來 chhōa 咱出頭天。

希伯來人經過平靜 ê 奴隸生活,本來想講按呢做奴隸嘛袂䆀,日子一工一工過,逐工唱奴隸 ê 歌,食奴隸 ê 飯,嘛是袂䆀。一直到目睭前出現著紅海,後面閣有法老 ê 追兵 ê 時,才忽然覺悟著性命 ê 現實,進無路,退無步。才知影唯一 ê 一條出路,就是向前衝,拚落去lah!真濟台灣人到今仔日可能嘛是想:住佇這塊土地,繼續做奴隸,mài tín-tāng,「一動不如一靜」豈 m̄ 是較好呢?

摩西予上帝對河中 giú 出來,上帝一定嘛欲佇大風大湧中,giú 出一位台灣人 ê 摩西。佇大風大水中上帝叫摩西將枴仔向海伸出去,海水就分開,新 ê 希望 kap 性命 ê 水泉就會湧出來。

世界人看咱台灣親像孤兒,kā 咱設真濟陷阱 kap 窒礙。但是台灣人 m̄ 是孤兒,是世界 ê 主人,咱 m̄ 通恬恬坐 teh 等,咱著行出去,行到全世界,出紅海,進入新天地。彭明敏先生 ê 近作《對『自救』到『自覺』》就是講咱拄著大燒山、大洪水 ê 時陣,著發揮台灣人剛毅豪邁 ê 精神繼續拍拚。世界有 3/4 ê 國家比咱台灣較小,咱著愛有自信、自愛、自重、自尊堅持落去,對頭開始建設咱 ê 國家。

廣告/手到心至抄寫本-箴言

我有話要說