【讀者回應】〈相輸〉讀後感

(相片提供/Pixabay)

◎林朝成

讀完《台灣教會公報》3664、3665期台文天地 ê〈相輸〉,互我真意外,律師原來真希望得著200萬,甘願互人關15年,到最後伊因為讀真濟冊,伊悟道,伊明白人擁有世間 ê 榮華富貴、金銀財寶,當伊死 ê 時,一切攏是空空,只有得著靈魂永遠 ê 活命,才是上寶貴 ê。律師讀真濟冊以後,伊悟出 ê 人生真理,就是主耶穌佇馬太福音16章26節講 ê 道理:「人若得著全世界,煞喪失家己 ê 性命,有什麼利益?人會當用什麼代價,來交換家己的性命?」所以世間 ê 道理若識有透,就會知影主耶穌所講 ê 話,就是真理。

咱無親像這位律師,有 hiah-nī 濟時間,讀世間所有 ê 冊。毋 koh 咱若讀諾貝爾文學獎得主,親像:卡繆、貝克特、索忍尼辛、泰戈爾、羅曼羅蘭等作家 ê 作品,就會領悟人生 ê 意義,無在佇追求物質 ê 世界,是在佇追求屬靈 ê 世界。基督徒真幸運,只要讀聖經,就會曉悟人生 ê 意義,毋是追求世間 ê 榮華富貴、金銀財寶,乃是佇主耶穌內面,得著靈魂永遠 ê 活命。 (作者為退休牧師)

我有話要說