Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
福伯講：「幾十冬前我有一个朋友林先生佇台北市開一間店，日時生理真好，黃昏暗tio̍h關門歇睏。有一工，有一个人來kā拜訪，講：『恁亭仔跤暗時kám ē-sái借我bē mi̍h-chia̍h（賣物食）？』林先生想講暗時有影無用tio̍h，借人排擔仔bē mi̍h-chia̍h mā算是幫助人一家ē-tàng生活，伊tio̍h慷慨答應。Chit ê麵擔仔mā算真認份，每暗半暝收攤了後有kā亭仔跤拚掃kah真清氣。按呢過了十幾年，有一工，管區ê警察來kā林先生講，後個月起，全台北市ê亭仔跤無管日時暗時攏禁止排擔仔。Hit暗林先生tio̍h kā麵擔仔講chit ê情形。無疑誤麵擔仔煞真受氣，問林先生你叫我搬走，我beh去叼位排擔仔？你tio̍h付我權利金。無，免講！林先生無應半句。第二工管區警察來，林先生講hō͘聽，怨歎講，咱台灣俗語話講「豆油分你搵，碟仔煞捧去！（Tāu-iû pun lí ùn, tî-á soah phâng khì !）」確實按呢，十外年來，我無收伊一角銀租金，伊mā m̄-bat買一盒餅來kā我說謝，今仔日請伊搬走，講叫我tio̍h付伊啥物權利金！管區警察安慰林先生講，免受氣免煩惱，我來處理tio̍h好。Hit暗管區警察來kā麵擔仔講，後個月初一起，全台北市亭仔腳攏總bē使排路邊攤仔，掠一遍開一張罰單。月初，麵擔仔tio̍h無koh來。」
我講：「福伯，你講ê是永過ê代誌，chit-má應該無chiah-nī拗蠻ê人。」
福伯聽了大笑：「Thài ē bô？前台北市長柯文哲tio̍h是chit款人！2018年11月21，台北市長選舉，柯文哲市長連任成功。伊siàu-siūⁿ親民黨有競選總統ê入門券，伊tio̍h緊向親民黨主席宋楚瑜表示親密，拜託宋主席ē-tàng kā親民黨ê大將黃珊珊借伊用。宋楚瑜主席答應了，2019年10月16，柯市長正式邀請已經做市議員21年ê黃珊珊作台北市副市長。親民黨市議員林國成mā宣布退黨，柯文哲主席koh任命林國成議員ê查某囝林珍羽作民眾黨副發言人、了後才任命伊作台北市政府副發言人。親民黨自按呢佇台北市議會斷種，歸个豆油碟仔煞hông捧去。頂面有tǹg 一个2019年8月初六才成立ê民眾黨ê大印。」
福伯講：「2022年8月28，黃珊珊辭掉已經作beh三年ê副市長，宣布以無黨籍ê身分正式投入台北市長選舉。柯文哲市長講戇話講：『親民黨主席宋楚瑜應該會來kā黃珊珊徛台。』宋主席當然無來。黃珊珊解說講：『宋主席也m̄是台北市民。』M̄驚笑破人ê喙？比較khah戇ê是親民黨副主席張昭雄，攏有去kā黃珊珊徛台，m̄知徛啥物意思！豆油分你搵，豆油碟仔煞捧去，bē受氣ê人實在無濟。Chit句台灣俗語話應該猶ē koh thn̂g（傳）一站仔。」
