Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Png Gêng-hōng
Góa chia̍h kah chia-nī chē hòe﹐ tē-it-pái the̍h pit siá “Góa ê A-bú.” Chū sè-hàn pē-bú lóng m̄-kam hō͘ goán sì ê gín-á chia̍h khó͘. Góa téng-koân ū chi̍t ê a-hiaⁿ, chi̍t ê a-chí kap góa koh ū chi̍t ê sió-tī-á. Pē-bú kan-ta ǹg-bāng goán pêng-an kiān-khong sūn-sī tōa-hàn. Sui-bóng tī goán chit chióng thoân-thóng ê ka-têng, khah bē-hiáu piáu-ta̍t tùi chhù-lāi chhin-lâng ê koan-sim, bêng-bêng chai-iáⁿ sī beh piáu-sī ka-kī tùi pē-bú ê koan-sim, sòa lóng ēng phái-siaⁿ-sàu ê kháu-khì lâi piáu-ta̍t koan-sim. M̄-koh a-bú lóng ē thé-liōng chò cha-bó͘-kiáⁿ ê sim-ì, i chai-iáⁿ góa sī “to-á chhùi﹐ tāu-hū sim” bē kā góa kè-kàu.
A-bú bô tha̍k chheh, mā m̄-bat jī, só͘-í tùi goán ê kàu-io̍k tō chhin-chhiūⁿ leh chhī pàng-soaⁿ-ke kāng-khoán, sûi-chāi goán ka-kī ê châi-chêng kap chō-hòa. Nā tha̍k ū chheh, in koh khah kan-khó͘ mā ē phah-piàⁿ thàn-chîⁿ hō͘ goán tha̍k, bē-hiáu tha̍k-chheh–ê tō kó͘-lē goán khì o̍h kang-hu. Goán hit ê nî-tāi, o̍h sai-á sī chhōe-thâu-lō͘ kap chhī oa̍h ka-kī siōng kán-tan iū-koh an-ún ê hong-hoat. Góa chhut siā-hōe kè-ang liáu-āu, chi̍t-lō͘ kiâⁿ–lâi chiah ta̍uh-ta̍uh-á thé-hōe tio̍h siā-hōe sū, m̄-sī chhiūⁿ pē-bú kóng–ê hiah-nī kán-tan. Tng góa seng-keh chò lāu-bú ê sî, chin-chiàⁿ kám-siū tio̍h a-bú sù-siông kóng ê hit kù ōe: “Chhiú phō hâi-jî, chiah chai pē-bú sî.” Hit-chūn chiah thé-hōe–tio̍h chò sī-tōa-lâng ê iōng-sim. Kî-si̍t lán chū sè-hàn kàu chit-má, chò-hóe seng-oa̍h ê chêng-hêng í-keng ū kái-piàn, góa koh khah tin-sioh khah chá kap a-bú chò-hóe seng-oa̍h, khai-káng ê sî-chūn.
Kū-nî, a-bú bô-sè-jī siak tn̄g kha-thâu-u, chit-má lóng m̄-káⁿ ka-kī kiâⁿ-lō͘, ū sî-chūn liân pàng sái-jiō ka-kī mā m̄-chai-iáⁿ. Hó-ka-chài! Ji̍t–sî ū siā-khu ho̍k-bū-oân lâi tàu khòaⁿ-kò͘ a-bú. In-ūi a-chí bô kè, ē-po͘ hā-pan tńg-lâi chhù–ni̍h, tàu hun-tam chiàu-kò͘ pē-bú ê tàⁿ, pē-bú kan-khó͘ pēⁿ-thiàⁿ ê tāi-chì lóng lám tī i ê sin-chiūⁿ. Ta̍k-kang e-àm góa lóng ē kap ang-sài tńg-khì āu-thâu khòaⁿ a-bú, ū-sî a-bú m̄-chai i koh pàng sái-jiō, kō kah kui sin-khu, góa kap a-chí tō tòng-bē-tiâu ē kā i tōa-siaⁿ hoah. Tng khòaⁿ tio̍h a-bú lâu-ba̍k-sái ê sî, góa khòaⁿ–tio̍h mā chin m̄-kam. “Pē-bú thiàⁿ kiáⁿ tn̂g chúi lâu, kiáⁿ thiàⁿ pē-bú chhiū- bóe hong.” Góa chai-iáⁿ, i mā bē ài án-ni! Góa tùi a-bú ê ài, sī éng-oán bē piàn–ê, ǹg-bāng a-bú ê sin-thé ē-tàng ióng-kiāⁿ chia̍h pah-jī, hō͘ góa ē-tàng hó-hó-á iú-hàu, góa beh tōa-siaⁿ kóng: “A-bú, góa ài–lí.”
