◎蔡澄甫
《台灣教會公報》3199期25版〈死貓吊樹頭，死狗放水流〉一文，挑（thio）起童年ê回憶。無衛生惹人厭的風俗，卻有一直 teh 支持 in 延續規百年 ê「行善動機」；人深信 che 是善事義舉。阮 bat 請教老輩，無得 tio̍h 定論，iáu 是阮外媽講了 siōng 合邏輯條理。
基督徒 ê 立場講怪力亂神是無合宜，不過企（khiā） tī 鄉土歷史文化蒐集片紙殘瓦 ê 立埸，是值得將所知來公表。外媽是阮床邊故事的名嘴，伊若來阮兜做客，阮兄弟相爭beh 睏伊身軀邊聽伊講古。請容允我來做善意建設性 ê 補充說明：
◆死貓吊樹頭
古早時貓虎是形影不離 ê 好朋友。虎一直欣羨貓lia̍p-chia̍p ê kha手，看伊細隻bóng細隻，su̍t 一個就 peh 上樹頂。有一工，虎就kā貓講，教我 peh 樹 ê 功夫好 boh？貓講，你若教我展威，我就教你 peh 樹。虎一聲就同意，講阿貓賢弟緊教我，貓講無noh，你是大哥，你愛先教我，了後小弟 chiah 教你。虎想想leh，就第 tāi-seng 教貓虎背展威。無久貓就學 tio̍h 展威 ê功夫，喝一聲虎兄bye-bye！Oa̍t 頭就無看得影。
當虎知影去hō͘ 貓術去，真受氣，大聲咒chōa 講，貓啊貓，tùi taⁿ以後，無論你走到天邊海角去 bih 貓（躲貓貓），我都beh掠你出來拆 cha̍h 落腹，無放你干休。
Tùi彼時起，貓開始 ng-ng-iap-iap 過 tio̍h 逃亡走路 ê 生活，日睏暝動，驚 hō͘ 虎掠著，連屎尿都 lóng 挖土khàm砂掩（iám）氣味，驚行踪敗露就無命。後來連貓主知影貓虎間的恩怨，將貓吊 tī 虎探（tham）bōe tio̍h ê 樹頭，免得虎來鞭屍報仇。
◆死狗放水流
狗是咱忠實ê朋友，忠義重情，顧厝宅，顧土地，一生效勞恩人一家。聽講一位員外一隻bat幫贊（chān）伊起家 ê 老狗死去，伊真傷心 m̄ 甘，決定beh用親人死失的厚禮來辦後事。
彼暗，土地公來託夢：「員外，狗本屬『土』，伊放尿都無四kha貼（tah）地，是teh敬土，若 tâi 狗入土，就害伊萬世不得投胎。若疼伊，就kā放水流。
一來hō͘伊緊緊消退迷戀凡間未完火熱 ê 溫度，緊去轉世；二來利用伊『土克水』的天性，保庇恁庄頭土地豐收，規年水量夠額，無苦旱、無水災。」
一個反科學 ê 習俗，卻深深刻 tī 台灣人心田規世紀，成做善念 ê 基礎，ka-chài 環保衛生 ê 智慧夠額咱掃除迷信，此種行為就 beh 歸入歷史。
（作者為台文工作者）
