走精ê海翁台灣文學營

◎郭燕霖

為復興台語文,一寡台語文社團固定辦台灣文學營chhui-sak台灣文化,海翁台灣文學營是一例,不過2013年海翁台灣文學營渡過烏水溝去中國福建廈門舉辦,主辦單位海翁台語文教育協會榮譽理事長蔡金安表示uì 8月初2到初7,6工5暝ê行程,有台灣kap中國學員約120名,包括國小台語教師kap關心台文發展ê少年學員,探討台灣文學kap閩南文化,除了語文ê課程,營隊koh為學員安排廈門2日遊,包括海上花園、鼓浪嶼,以及參觀福建土樓。身兼安平文教基金會董事長蔡金安iah表示希望安平文教基金會kap廈門市閩南文化研究會合作,佇廈門成立辦事處,設立「閩南文化沙龍」,hō͘藝文人士ē-tàng有場所kap台灣民眾進行交流。主辦者蔡金安運用台文營營主任kap安平文教基金會董事長雙重ê身分chhui-sak閩南文化,這部分中國統戰ê手路值得台文工作者好禮仔思考。

文學營咱台灣學者有陳明仁「台語文學介紹」、林茂賢主講「台灣民俗漫談」、黃勁連講「台灣褒歌」、蔡金安講「『閩南語』古詩吟唱」,音樂人林垂立講「『閩南語』歌曲創作元素ê生活」。In中國學者有廈門市文化館副館長黃念旭講「廈門非物質文化遺產」、廈門市閩南文化研究會會長陳耕講「身為閩南人的驕傲」、廈門大學人文學院周長楫講授「閩南方言的語文的書寫問題」、徐學教授講「閩南語文學的觀察與思考、中華傳統文化與華人華僑」等。

這款 ê「交流法」,引起 bē 少台文工作者質疑。台文工作者鄭雅怡2011年參加佇南鯤鯓舉辦ê海翁台灣文學營,針對台文營透濫「廈門」閩南文化課程,bat以「台灣ê主體性kám m̄免khîⁿ hō͘ tiâu?」為題投稿《首都詩報》;2009年時擔任海翁台文營營主任李勤岸表示,佇海翁文學營理監事會議決議佮中國交流無反對,不過一定ài是徛佇對等。 

若照李勤岸ê講法,今年the̍h「台胞證」去廈門參加文學營ê台灣學員kap工作人員,真有可能違反2009年 ê 理監事會決議,而且今年海翁台文營徙去中國廈門舉辦是毋是經過海翁文學營ê理監事會議討論、授權,mā值得外界關心;台文營活動是毋是有中資介入補助,這部分恐驚主辦單位有義務向外界說明。

2012年,馬政府bat透過成大閩南文化研究中心舉辦「世界閩南文化節」,目的是收編台灣文化做閩南文化,當然本國台灣人無一定認同筆者ê看法,不過中方透過chit-ê活動卻是達成向外界宣傳台灣文化閩南化ê策略。今年ê海翁台灣文學營,若無看名稱,kan-taⁿ看課程內容,hoān-sè外界kiò-sī「廈門閩南文學營」,che毋是咱台文工作者希望ê目標,不過中國統戰部門策略真清楚,Carthage hō͘生理人出賣亡國這段歷史thèng好運用之,台文運動兼個人生理cháu-chông,何者為重,歡迎「閩南人」蔡金安「台胞」賜教。

(作者為台灣教師聯盟秘書長)

廣告/手到心至抄寫本-箴言

我有話要說