◎Lîm Chùn-io̍k
真歡喜mā真感謝，我有機會讀tio̍h所敬愛ê盧俊義牧師hit篇「不講台語等於不愛台灣？」（《台灣教會公報》3212期），文中點出「語言m̄是靠到教會參加禮拜培養起來ê……」，伊ê意思kah-ná是teh講：家長m̄-thang kā「母語」ê責任推hō͘教會。其實咱每一個人lóng tio̍h負起責任，因為咱lóng是「國語政策」ê受害者！
這hō͘我想起教育部第一屆「母語貢獻獎」（2006年）頒獎典禮，杜正勝部長講：「阿公、阿媽m̄ kah孫á講咱家己ê母語，koh用講kah lî-lî-lak-lak ê台灣國語teh kah孫á講話，kan-taⁿ叫教育部推廣母語，kám有你法？」
自然會曉ê母語是指「聽kah講」，m̄是用「教」ê，是靠大環境（家庭、教會、學校、社會等等）lóng講母語to̍h自然會曉；「讀kah寫」to̍h需要學，美國gín-á mā lóng去學校學ABC，kan-taⁿ台灣人m̄學家己ê白話字。所以鄭兒玉牧師tiāⁿ-tiāⁿ講：「台灣人是世界上siōng奇怪ê民族，學別人ê語言to̍h lù-lù叫，學家己ê台語to̍h 學kah lî-lî-lak-lak。」
我2001年tùi李勤岸教授學台語白話字，to̍h tam-tio̍h母語情感ê滋味，就án-ne全心投入台灣母語運動。我感覺tī電腦ê時代，台灣母語tio̍h有家己ê輸入法chiah ē-tàng活落去，經過chiâⁿ十年ê苦心，開發出並催生「信望愛台語客語輸入法」，thang hō͘咱台語文有書「寫」ê工具。
「讀」台灣母語ê方面，我感覺若無讀ê物件，beh án怎鼓舞台灣人來學母語？我to̍h積極tī《台灣公論報》編輯〈台灣母語專刊──蕃薯園〉（2003年到2011年停刊為止）；催生《新使者》雜誌ê「母語葡萄園」；開拓「台語信望愛」、「客語信望愛」、「思羅安信望愛（台語點字）」等網站；翻寫《平民ê基督傳》、《紅皮聖經》kah《荒漠甘泉》等ê漢羅版，由台灣教會公報社出版。
我mā有感覺大家（包括我家己kah大部分ê長老、執事司會以及牧師引用經節）讀台語聖經，讀kah真辛苦，koh tiāⁿ-tiāⁿ 讀kah lî-lî-lak-lak，因為hit本《白話字聖經》á是《台語漢字本》是廈門話，約10% kah咱ê台語無仝。我先tī台語信望愛網站架設《巴克禮聖經》ê有聲讀經功能，最近koh kah蕭清芬牧師以及郭得列牧師teh進行《全民台語聖經》（kā hit本巴克禮修訂ê廈門話白話字聖經，改寫做普遍腔台語），ǹg望咱台灣人有家己ê母語聖經thang讀。
《全民台語聖經》有得tio̍h世界台灣人基督教會協會（WATCC）第11屆會員大會ê認同，ǹg望「新舊約全書」ē-tàng tī 2015年台灣基督長老教會慶祝150週年中間，成做芳芳ê祭獻hō͘上帝。Mā ǹg望台灣基督長老教會總會，趁chit-ê機會發起「白話字新運動」，包括台語、客語 kah 原住民語 lóng ē-tàng 得tio̍h新ê活命。Án-ne 咱chiah對得起咱ê信仰祖先，in有留hō͘咱hiah súi ê文化資產──白話字，咱kám thang 做「敗家子」（鄭兒玉牧師ê話），kā白話字放sak掉？
（作者為台語文工作者）
