Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳柏壽
阮教會內底各色人攏有，親像kap張–ê講話二句話未煞，話題隨轉去台中一中，一中是伊永遠ê驕傲，親像全世界只有台中一中ê款。若kap黃–ê講話，話題一定轉去台大，講著伊按怎解剖屍體ê英雄事蹟，目睭to̍h起大粒，聲嗽to̍h起大聲。美惠姊每一擺potluck一定煮伊彼盤鹹菜豬肚，我毋知有幾个人去gèⁿ彼盤菜。阿美–á已經幾仔年攏捧一盤青菜沙拉。班長最愛講ê是按怎刣蛇，蛇膽配燒酒吞落去，伊講按呢人chiah ē有膽。劉–sàng講著in竹山ê筍仔就講袂煞，kap璨哥講著in關廟ê鳳梨ê時仝款。林–先生開喙合喙就是愛講台獨，tiāⁿ-tiāⁿ kap人tùi-chhiâng。一樣米飼百樣人，咱教會內逐家攏表現in家己ê形，真散形，無am-khàm，五角銀魚脯仔攏是頭，這就是咱教會ê特色。但是每擺若有代誌發生，大家to̍h攏kat-kat做伙，同心合一，無人敢來咱教會chhàng-chhiu。這是一陣活跳跳ê人、活跳跳ê教會。
我牧師做久，變做一个真「有形」ê人，對重外表、穿插、chng-thāⁿ、規矩，講話嘛著細膩，bē sái siuⁿ大聲、chhóng-pōng，這款牧師ê形像漸漸變做會友對牧師ê要求，嘛漸漸變做牧師塑造家己ê動機。若無，會去hō͘人笑。
家己回想chi̍t-sì-lâng家己塑造ê標準「牧師形」，才感覺是我chit-sì-lâng ê失敗，因為我攏毋捌佇眾人頭前跳出來用單純ê形顯出真正ê我。宗教真正塑造一个人ê面殼，無論啥物宗教，攏會要求人人用in ê教條kap教義來hō͘-siong chih-chiap kap交通，才有法度發揮in宗教ê特色。
有人講我佇意識上想欲破壞這个既成ê牧師ê形像，就是破格，是社會上無sù-phòe、無四正ê想法。這我有同意，因為人既然生活佇人ê社會內面，著服從這个社會ê規範，叫做「功能社會」（functional society），人人攏扮演一个「功能」，社會才有法度運行。
但是ùi開始牧會kàu taⁿ，佇我心內深ê所在，不斷有一個个聲咧kā我講，著去破壞去，去除這款社會功能kap制限，因為遮ê社會規範實在有真濟部分，teh jia-khàm真正ê人性。人若ē-tàng破壞遮ê束縛kap制限，就漸漸會chhōe tio̍h khah純全ê道理。主耶穌講：你tio̍h認捌真理，因為真理欲hō͘你得自由（約翰福音8章32節）。對我來講，嘛ē sái講：真理hō͘我變做一個「自由ê人」。只是，自由人有時會hō͘人看做怪人。
主耶穌賞賜hō͘咱ê自由，並毋是無條件ê白白ê賞賜，嘛著經過咱家己ê努力追求，經過咱家己肉體kap精神ê苦鍊，才有法度得著ê。主耶穌賞賜世間ê liap-lí是「自由」，這个「自由」是做一个人。特別是做一个基督徒，一生最大ê功課，是達到咱生命ê目標：這个目標是欲解脫咱所有ê束縛kap纏絆，hō͘咱ē-tàng進入khah koân ê世界。咱若保持用散形ê目睭看世間，並毋是表示咱khah愚戇，顛倒是表示咱khah有生活ê智慧，表示咱頭前ê路會真開朗，天氣會真清，阻擋ê代誌會真減少。主耶穌來世間ê時，只有kap散赤人、破相、外邦人、罪人，kap人看無起ê人、怪人做伙。最重要ê，伊毋捌kap大官貴人，穿插真漂撇ê人，講話真有勢頭ê人做伙。主耶穌ê全人生攏kap hia-ê人想講是破格ê人做伙生活。主耶穌佇伊ê時代hō͘人當作怪人，若是生活佇今仔日，我想伊嘛會hō͘人當作怪人。歷史上咧支持教會行正路ê人，khah濟攏嘛是chiah ê怪人：亞伯拉罕、喇合、以利亞、耶利米、抹大拉ê馬利亞等等。遮ê人ê一生khah濟毋是掛慮別人按怎看in，是全心全意掛慮上帝按怎看in。
主耶穌講，伊來世間欲hō͘人得著「豐盛」ê活命（約翰福音10章10節）。我想伊ê意思就是叫人毋通掛慮siuⁿ濟，今仔日日頭出來欲行去to̍h位，看風吹向to̍h一爿，向彼爿行就對lah！毋免想傷濟。我想起過去ê一生ê路，khah濟毋是我teh做主，khah濟是順上帝ê風咧行，順上帝ê安排，去行我ê路。我想這就是自由人ê人生觀。
主耶穌若是咱信仰ê典型，咱chiah ê宗教人，kap咱所自認是信仰ê典型ê人，著去想著主耶穌，咱就會得著完全tò-péng ê覺悟。Taⁿ，佇我有限ê chhun ê人生，唯一ê使命kap工程，就是褪去我ê宗教人ê外衫kap假面，恢復做一个普通人。雖然有時會hō͘人看做一個散形ê人，卻是自然koh健康ê。
