Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Khiap-sì
I hiah ê lô͘-po̍k chiū kā i kóng, “Tio̍h kā góa ê chú góa ê ông chhē chi̍t ê chāi-sek-lú, hō͘ i khiā tī ông ê bīn-chêng lâi hōng-sêng i ; koh khùn tī lí ê heng-chêng, thang hō͘ góa ê chú góa ê ông tit-tio̍h sio.” – I Lia̍t-ông-kì 1:2
Goán lāu-bú kòe-sin liáu-āu, goán hiaⁿ-tī chí-mōe ta̍k-ke chham-siông khòaⁿ ē-tàng kā kò͘ goán a-bú hit ê Ìn-nî A-koan lâu–lo̍h–lâi chiàu-kò͘ a-pa á-bōe.
Góa mn̄g A-koan, i kā góa kóng: “Góa í-keng lâi Tâi-oân la̍k tang, siūⁿ beh tńg-khì hioh-khùn–chi̍t–ê.”
A-koan tńg-khì pòaⁿ-tang liáu-āu, ū chi̍t kang ka-kī khà tiān-ōe lâi kóng i siūⁿ beh koh tńg-lâi Tâi-oân chò khang-khè. Góa khì mn̄g gōa-lô ín-chìn kong-si, in kóng ē sái hō͘ i lâi goán tau, chit piàn hō͘ i lâi pôe a-kong, án-ne goán ta̍k-ke mā khah an-sim.
A-koan tû-liáu pôe a-kong sàn-pō͘ khòaⁿ tiān-sī í-gōa, i tī goán-tau m̄-bián chú-chia̍h, i mā bē-hiáu chú, nā kàu tiong-tàu kan-taⁿ khì bé chi̍t lia̍p pn̄g-pau tńg-lâi hō͘ a-kong chia̍h to ē-sái.
A-koan tńg–lâi chha-put-to chi̍t tang liáu-āu, ū chi̍t ji̍t goán lāu-pē kā góa kóng: “Lí khì kiò lín bó͘ chhōa A-koan khì chhài-chhī-á bé kúi-niá-á súi-saⁿ hó–bô.
Góa teh siūⁿ, kám ē chit kúi kang thiⁿ-khì léng, i khòaⁿ A-koan bô saⁿ thang chhēng ê khoán, góa kā goán lāu-pē kau-tài ê chit chân tāi-chì tńg-khì pài-thok goán bó͘ .
Eng-àm chia̍h-pn̄g ê sî, góa mn̄g goán bó͘ kóng A-koan ū bé tio̍h kah-ì ê saⁿ á-bô ?
Goán bó͘ ba̍k-chiu thí chin tōa-lúi kā góa kóng: “M̄ sī A-koan ài bé súi saⁿ, sī a-pah mî-phōe kà bōe sio.”
Tī pòaⁿ-mî bāng tiong, góa siūⁿ tio̍h Sèng-keng kóng tio̍h nî-lāu ê Tāi-pit kap Su-liām ê lú-chú, iū koh siūⁿ-tio̍h goán lāu-pē, góa sim-koaⁿ chhiak chi̍t ê sòa hoân-ló khí–lâi.
