◎歹銅舊鍚
橫霸的目睭仁反射蛀去的十字架，天星猶原看顧我
「我欲姦死你芝屄，破媌！
毋通怨，好好仔滿足我的野蠻，我是男子漢」
強欲一半的靈魂予伊拖出來凌遲
刜刜刜刜刜刜…＼痟狂刜，刜甲倒蕊目睭仁攏欲落–出-來…
痟狂摃伊的肉體＼蹔伊的四肢＼裂開伊的衫仔褲＼摃摃摃摃摃…
用伊的邪水毒死伊的自尊…
…《性侵害犯罪防治法》的出世是查某人的意念
死亡的姿態是一種手路，35逝刀痕𠞭出平等
賰四支指頭仔的倒手猶原有才調舂破傳統
佇烏暗的暗暝穿迥查埔人最後的牆堵佮驕傲
我知影我欲獻祭，月娘請記錄我的遺言：
無聲的刀喙吮食我淺眠的脈
扭曲的面腔覕佇攝護線的尾溜偷偷仔笑
焦去的血應該用愛河的水才洗會清
我無愛芳水嘛無愛福馬林的氣味
向望的穎對臭爛的死體發出來
斟酌聽，蔥脆的聲音是平等的開始
空冇冇的林投林袂有另一个鬼仔古
佇夢行向落徛，看著的是一條安全的路
月幻幻，有關著凶殺的動詞攏是仝款的生冷
一種對階級的宣示佮自卑
明仔載的頭條凡勢有五花十色的版本
總是，毋通袂記共我的意念交落
「破媌！敢反抗！臭膣屄！」
月娘嘛驚著覕起來。刀聲共風敲一下流目屎
查埔人臭汗酸予天地攏替伊感覺歹勢
抵抗是欲予知查某人毋是軟仔。我嘛會驚。
獻祭予平等的想像。烏暗過去就會有光。
揬破我的子宮割開我的胸坎過去就是改變
燒燙燙的憤怒無人知影
硬插的雄性無需要毒死剪絨仔花
高潮的喜樂比袂過良心的後悔
生銑的刀肉予血喊醒殘暴的意識
濁濁的遺言吐出來一欉烏金色的山棧花
搖搖幌幌試欲探頭出來共枉屈的空喙補綻
潲液加速死亡的臭臊味，破糊糊的衫褲向社會請安
一條刑事案件跋落去明仔載的頭條
烏黔黔的龍捲流牽扯女權火照夜路
四四散散的現場閣賰一半的靈魂堅持無流目屎
彼粒天星徙動量其約5公分，是正蕊目睭共我講的
我的身軀冷去矣，煞感受著你痟狂的脈
我的溫柔毋是你的，我的笑容是屬於未來
你袂理解查某人的意念是啥物款的力頭
據在你𠞭據在你𧮙據在你笑
我嘛袂咒讖你。你的勝利干焦佇時間的死角
我的榮光嘛袂佇赤裼裼的膣屄
月幻幻，無張無持的告白刊佇明仔載的頭版
查某人的哀哮毋愛粗俗的弔祭
斟酌讀，蛀去的十字架頂有聖徒馬利亞的笑容…
註：聖徒馬利亞指抹大拉的馬利亞。聖經女權的象徵。受害者是咱高中數學老師的某——彭婉如。以詩紀念。
