Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Siūⁿ khí góa sè-hàn ê sî, góa ê a-bú tī chhài-chhī-á-kháu khui chi̍t keng kám-á-tiàm. In-ūi seng-lí chin-hó, múi-ji̍t lóng chin bô-êng, tì-sú bô-hoat-tō͘ sî-siông chiàu-kò͘ góa. Góa ê a-pa ài kap lâng kau-pôe, tiāⁿ-tiāⁿ bô tī chhù-lāi. A-má chiū chiâⁿ chòe góa siōng hó ê pêng-iú .
Goán ê tiàm-kháu ū hō͘ tiān-iáⁿ-īⁿ tah kóng-kò, tō ū sàng bián-hùi ê tiān-iáⁿ-phiò, A-má ū-sî-chūn ē chhōa góa chò-hóe khì khòaⁿ tiān-iáⁿ, sui-jiân ū sî khòaⁿ m̄-ba̍t, m̄-koh ki-á-peng liâng-liâng iū-koh sòa-chhùi, che mā-sī góa siōng hoaⁿ-hí ê sî-chūn.
Góa beh kóng chi̍t kù si̍t-chāi-ōe, a-má kap ki-á-peng lóng hō͘ lâng siàu-liām.
Joa̍h-thiⁿ ê àm-mî, pâng-keng chhin-chhiūⁿ hóe-lô͘ leh sio, sui-jiân ū nê báng-tà, m̄-koh lâu-kōaⁿ ê chhàu-kōaⁿ-sng-bī chóng-sī hō͘ báng-á kiông-beh tòng-bē-tiâu, in chhōe-khang-chhōe-phāng piàⁿ-sí nǹg-ji̍p-lâi chí-chhùi-ta, hit-sî tó tī bîn-chhn̂g ê góa, péng-lâi-péng-khì khùn bē lo̍h-bîn, a-má ê khôe-sìⁿ chiū phiat-lâi-phiat-khì, a-má chho͘-chho͘ ê chhiú, tī góa ê kha-chiah-phiaⁿ so-lâi-so-khì.
Hit khoán kám-kak, si̍t-chāi chin khùiⁿ-oa̍h, kàu taⁿ sui-jiân keng-kòe la̍k-cha̍p tang iáu ē kì–tit.
A-má sī góa ê pó-pòe, éng-oán khǹg tī sim-koaⁿ-lāi.
