Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯講，立委選舉活動拍kah上熱ê一月初五，宜蘭縣民進黨立委候選人陳俊宇講咱：「縣內干單我當選會支持游錫堃連任立法院長，兩個佇國會做伙拍拚，請鄉親『Sioh hoe liân phûn（惜花連盆）』。」兩人做伙喝出「疼惜游錫堃，票投陳俊宇」爭取支持。福伯講，陳俊宇真巧，會曉請宜蘭縣政界ê大前輩游錫堃kah伊徛做ê來giú票，游錫堃是宜蘭出身ê農家子弟，ùi台灣省議員拚起，當選過宜蘭縣長、擔任過行政院副院長、總統府秘書長、行政院長、民主進步黨主席，koh是當時現任ê立法院長。陳俊宇相信宜蘭人對游錫堃會有一份感謝kah疼惜，用「惜花連盆」來拜託宜蘭鄉親，用疼惜游錫堃ê心來疼惜伊、支持伊。
福伯講，「惜花連盆」chit句台灣俗語話，是講一個愛種花ê人因為疼惜伊ê花，仝款疼惜用來種花ê花盆。有人會續落去講：「Sioh kiáⁿ liân sun（惜囝連孫）」，意思是講疼惜子女，連子女ê子女也tio̍h是內外孫mā攏疼惜參落去。
宜蘭hông稱呼作黨外時代ê「民主聖地」，現此時，縣長卻是中國國民黨籍，鄉鎮市長mā一半以上是中國國民黨籍，縣議員mā占多數。但是2024年chit遍立委選舉結果中國國民黨籍慘敗，主要ê藍營票倉宜蘭市kah羅東鎮攏bē-tàng守tiâu，中國國民黨候選人黃琤婷除了兩個山地鄉小贏以外，平地鄉干單頭城鎮小小贏800外票，其他9個鄉鎮市攏輸。民進黨陳俊宇the̍h tio̍h 10萬7千外票、上懸票當選，ē-sái講是「惜花連盆」充分發揮出效果。
福伯講，Chit遍總統、副總統選舉，佇選前十工禁止公布民調進前，所有總統選舉民調看起來，民主進步黨干單贏中國國民黨3%至5%、極加是10%，確實會hông驚。頂遍2020年，民進黨蔡英文總統得tio̍h歷史上第一懸ê 817萬外票，得tio̍h 57.13%，比中國國民黨韓國瑜ê 38.61%，加18.52%走叼去？正月初二暗，民進黨推出「阮做伙，佇路上」ê影片，頭起先是蔡英文駛車，賴清德坐佇副駕駛座，8年來蔡總統車駛kah真chāi、台灣一直行佇正確ê路、tio̍h交hō͘經驗豐富ê人來繼續駛落去，蔡英文kā車鎖匙交hō͘賴清德，對賴清德kah坐佇副駕駛座ê蕭美琴講：「按呢我tio̍h真放心。」Che mā是運用「惜花連盆」ê 心理，beh 呼籲817萬外个當年疼惜蔡英文ê人，向望in今年tio̍h仝款來疼惜賴清德。Chit支影片超過一千萬人看過，真濟人謳咾。但是總統大選結果，民進黨賴清德才the̍h tio̍h 558萬外票、40.05%，贏中國國民黨侯友宜才91萬外票、6.56% niā-niā，可見「惜花連盆」ê效果無完全發揮出來，真在真可惜。
照按呢看起來，「惜花連盆」chit句台灣俗語話猶會koh時行一站。
