Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Tù-chiá◎Lloyd Edwin (Ted) Silverns
Hoan-e̍k◎Ông Bí-su
Kàu-tùi◎Lîm Bí-gio̍k
Góa chin ē-tàng thé-hōe sit-lo̍h kap chhōe–tio̍h sī sím-mi̍h kám-kak. Bô jōa-kú chìn-chêng, góa poaⁿ chhù, hit sî góa ū kòa ba̍k-kiàⁿ, chòe chi̍t-kóa kūn kū-lī ê khang-khòe, só͘-í ba̍k-kiàⁿ tō tī góa khòaⁿ ē tio̍h ê sè-kài. Liáu-āu góa chhōe bô ba̍k-kiàⁿ; bô lūn khòaⁿ tùi koân, àⁿ-lo̍h kē, lóng chhōe bô. Góa chhiáⁿ Betty tàu chhōe. I kā kui chhù-keng chhiau liáu-liáu, koh khì sûn chhia-téng; chhōe lóng bô. Hit nn̄g lé-pài góa piān-nā ū êng tō chhōe; koh lóng kòa o͘-jîn ba̍k-kiàⁿ, ā-sī bô kòa. Lō͘-bóe, Betty chhōe–tio̍h lah; goân-lâi góa kā ba̍k-kiàⁿ khǹg tī e̍k-keng-á ê tû-á téng-koân, he sī tng góa teh chòe chi̍t-kóa lī chiok kīn ê tāi-chì ê sî, ē khǹg ba̍k-kiàⁿ ê só͘-chāi. Goán chhōe-tio̍h phàng-kìⁿ ê ba̍k-kiàⁿ lah! Yeh! Ha-le-lu-iah.
Iâ-so͘ ê phì-jū
Che kap Iâ-so͘ só͘ kóng ê hū-jîn-lâng phàng-kìⁿ chi̍t ê gûn-á ê phì-jū chin sio-siāng. Hū-jîn-lâng tiám teng koh sàu chhù-lāi, phah-piàⁿ chhōe, jiân-āu chhōe–tio̍h. Chit ê kò͘-sū m̄ sī teh kóng sit-lo̍h, sī teh kóng chhōe–tio̍h, koh ū chhōe–tio̍h ê sî ê hoaⁿ-hí. Chhōe–tio̍h ê hoaⁿ-hí sī khàm-bē-tiâu–ê, bē kìm-tit beh kā lâng kóng. Só͘-í ‘iau-chhiáⁿ, khèng-chiok, khoài-lo̍k’ sī chit ê phì-jū ê iàu-tiám.
Kò͘-iûⁿ–ê sǹg iûⁿ; tng sǹg kàu ū chi̍t chiah iûⁿ-á bô–khì, i kèng-jiân khì chhōe hit chiah phàng-kìⁿ ê iûⁿ-á. Phah-m̄-kìⁿ ê tōng-sû sī ἀπόλλυμι, jī-bīn ê ì-sù sī “tī húi-bia̍t ê lō͘–ni̍h.” Iûⁿ ê sèng chin-chiàⁿ ē án-ne: nā in phàng-kìⁿ chiū-sī phàng-kìⁿ, tû-khí hông chhōe–tio̍h. Phàng-kìⁿ tō sī chiâⁿ-chòe bô hi-bāng, bô bī-lâi, tī húi-bia̍t ê lō͘–ni̍h.
Bo̍k-chiá kap iûⁿ-kûn ê koan-hē, chin sêng hiān-tāi lâng kap káu-á phōaⁿ ê koan-hē. Lán bat khòaⁿ-kìⁿ lâng tah kò-sī chhōe káu-á; sui-jiân hit chiah káu-á bē bô kúi sián chîⁿ, chóng–sī tit lâng thiàⁿ. Tng káu-á chhōe–tio̍h ê sî, chú-lâng ē jŏa-nih hoaⁿ-hí ah!
Jîn-lūi kiōng-tông ê keng-giām
Iûⁿ-á kap káu-á ê kè-ta̍t chāi tī lâng ū iàu-ì bô; á lâng ê kè-ta̍t leh? Téng-bīn ê keng-bûn lūn-khí chiap-la̍p bau̍h-sè–ê kap chōe-jîn ê tāi-chì, Iâ-so͘ chiah kóng-khí koan-hē sit-lo̍h kap chhōe–tio̍h ê phì-jū. Sit-lo̍h, chhōe bô, sī jîn-lūi kiōng-tông ê keng-giām, sī tī chin-si̍t seng-oa̍h tiong ē hoat-seng–ê. Góa ū chi̍t ê a-î kiat-hun chìn-chêng lâi khòaⁿ goán ma-ma; hit kang soah phàng-kiàn tēng-hun chhiú-chí! Goán kui chhù-keng péng liáu-liáu, bô to̍h sī bô. Che sī chiok siong-sim ê sit-lo̍h. Ū lâng han-bān jīn lō͘, tiāⁿ-tiāⁿ ē sit-lo̍h, chhōe bô lō͘.
Chóng–sī lán tiāⁿ-tiāⁿ tī tiōng-iàu ê tāi-chì ū sit-lo̍h. Pí bê-lō͘ koh khah giâm-tiōng–ê, sī ū lâng bê-sit tī í-keng hêng-sêng kúi-nā nî ê si̍p-koàn–ni̍h: ài chia̍h chiú, pháiⁿ sèng-tē, kóng ōe bô chún-sǹg, hêng-ûi pō-le̍k, bô kóng ha̍p-gî ê ōe, kóng lâng gō͘-sì-saⁿ, chiù-chhàm pa̍t lâng. Sio̍k-gí kóng “Chèng chi̍t ê soán-tek, tō siu-sêng chi̍t ê hêng-tōng. Chèng chi̍t ê hêng-tōng, tō siu-sêng chi̍t ê si̍p-koàn. Chèng chi̍t ê si̍p-koàn, tō siu-sêng chi̍t ê te̍k-chit. Chèng chi̍t ê te̍k-chit, tō siu-sêng chi̍t ê ūn-miā”. Sit-lo̍h m̄ sī tō-tek ê chhò-ngō͘, mā m̄ sī bô lûn-lí ê tāi-chì; sit-lo̍h sī poa̍h-lo̍h tī ná chhim-kheⁿ ê chân-chhù–ni̍h, bô kám-siū-tio̍h sìⁿ-miā ê kè-ta̍t kap ì-gī. Lâng si̍t-chāi sī chin oh-tit khì sêng-jīn pún-sin ū sit-lo̍h. Lán sit-lo̍h ê thêng-tō͘ jú tōa, tō jú ē khì hó͘-jīn, á-sī koài tang koài sai; chhiūⁿ kóng: “che tē-tô͘ siuⁿ bái”; “lí ā bô kā góa kóng chit ê bái só͘-chāi ê pak-pêng sī chit hiòng”; “lí kóng oat chiàⁿ-pêng ê sî, tiāⁿ-tiāⁿ sī oat tò-pêng, só͘-í góa tō oat tò-pêng a”. Lán bê-lō͘ ê sî, tiāⁿ-tiāⁿ bô beh thêng–lo̍h-lâi, khì mn̄g-chhut chèng-khak ê hong-hiòng, kiaⁿ hō͘ lâng lia̍h-chún lán sī khong–ê, gōng–ê (nā án-ni ū iáⁿ sī a-thut–ê).
Phàng-kìⁿ ba̍k-kiàⁿ ê sî-chūn, chin-chiàⁿ sī chhōe bē tio̍h ba̍k-kiàⁿ lah. Gûn-kak-á bōe ka-kī tùi thô͘-kha thiàu khí-lâi toh-téng. Bê-lō͘ ê iûⁿ ài khì kā i chhōe–tńg-lâi, in-ūi i pún-sin bōe hiáu tńg–lâi. Lán bê-lō͘ ê sî, mā su-iàu ū koan-sim–lán ê lâng kā lán chhōe–tńg-lâi; lán su-iàu ū lâng tùi-tiōng–lán, khòaⁿ lán chòe ū kè-ta̍t–ê; che tō sī thiàⁿ.
Sit-lo̍h, Chhiau-chhōe kap chhōe-tio̍h
Thâu chi̍t bō͘ sī sit-lo̍h, tē jī bō͘ sī chhiau-chhōe, tē saⁿ bō͘ sī chhōe–tio̍h. Thâu chi̍t ê sī pi-siong, sòa–lo̍h-lâi sī sit-bōng, lō͘-bóe sī hoaⁿ-hí. Tio̍h ōe kì–tit, chit nn̄g ê phì-jū m̄ sī koan-hē in-ūi sit-lo̍h tō ai-siong, á-sī chhiau-chhōe ê sî ē sit-bōng; sī koan-hē chhōe–tio̍h ê sî ê hoaⁿ-hí.
Lí kám chai-iáⁿ che sī sím-mi̍h ì-sù? Che sī leh kóng ū chi̍t ê pān iân-sia̍h ê chhù, hoan-gêng lí lâi. Lé-pài sī chi̍t tōa tīn hông chhōe–tio̍h ê lâng chū-chi̍p khí-lâi–ê; che piáu-sī “Chú sī lán ê bo̍k-chiá”; ì-sù sī sit-lo̍h ê lán goān-ì hō͘ Siōng-tè lâi ín-chhōa. Góa leh siūⁿ nā sī Ki-tok tī lán ê sî-tāi kap só͘-chāi kóng sit-lo̍h gûn-kak-á ê phì-jū, i tō ē kóng sit-lo̍h koh chhōe-tio̍h tēng-hun chhiú-chí ê kò͘-sū. I nā beh tī lán ê sî-tāi kap só͘-chāi kóng sit-lo̍h iûⁿ-á ê kò͘-sū, i tō ē kóng phàng-kìⁿ káu-á koh chhōe–tio̍h ê kò͘-sū.
Che hō͘ góa siūⁿ-tio̍h chi̍t ê tī Ài-su-ki-mô͘ chòe hoan-e̍k ê lâng ê kò͘-sū. I tī in ê bûn-hòa–ni̍h chhōe bô ‘hoaⁿ-hí’ ê jī-lūi; Inuit lâng ū khoài-lo̍k ê chêng-sū, chóng–sī he m̄ sī khoài-lo̍k nn̄g jī só͘ ē tàng piáu-ta̍t–ê. Ū chi̍t kang, chit ê hoan-e̍k-chiá khòaⁿ-tio̍h chi̍t chiah Hustky káu hui-siông hoaⁿ-hí leh khè kut-thâu. I kap piⁿ–á ê lâng khai-káng liáu-āu, tō chai-iáⁿ i chhōe-tio̍h chèng-khak ê jī-sû a; i chiū khí-sin khì kā Inuit lâng thoân hok-im. I kóng, Thiⁿ-sài ūi-tio̍h hoán-hóe ê chōe-jîn lâi hoaⁿ-hí, tō chhin-chhiūⁿ káu-á ê bóe-liu iô-lăi iô-khì.
Hoaⁿ-hí, put-koán sī chhōe-tio̍h sit-lo̍h ê gûn-kak-á, tēng-hun ê chhiú-chí, kā iûⁿ-á kiù–tńg-lâi, á-sī tńg–lâi ê káu-á, chhin-lâng phàng-kiàn, lo̍h-bóe chhōe–tio̍h lah, téng-téng; lóng ū. Kàu-hōe sī pān khèng-chiok tāi-hōe ê só͘-chāi, lé-pài sī hiah ê bat sit-lo̍h khiok hông chhōe–tio̍h ê lâng chò-hóe leh chū-chi̍p. Ē kì-tit ài hoan-ho͘ saⁿ pái Ha-le-lu-iah, koh tōa-tōa iô bóe-liu!
Thó-lūn
1. Lí kám ū sit-lo̍h koh chhōe bô ê keng-giām? tùi tī lí ū sím-mi̍h éng-hióng?
2. Phàng-kìⁿ koh chhōe–tio̍h liáu-āu, lí ē án-chóaⁿ piáu-ta̍t ka-kī ê hoaⁿ-hí?
3. Sit-lo̍h, chhiau-chhōe, chhōe–tio̍h, nā beh iōng-lâi pí-phēng lán kap Siōng-tè ê koan-hē, lí ê sìn-gióng lú-thêng kám ū lūi-sū ê keng-giām á-sī thé-hōe?
Gîm Sèng-si
137 siú ‘Iûⁿ káu-cha̍p-káu tó-teh pêng-an’
Hêng-tōng hong-àn
Tng kàu-hōe ū lâng kui-sìn, siūⁿ ch t ê khèng-chiok ê hong-sek, kap chèng hiaⁿ-ché chòe-hé hoaⁿ-hí.
Kî-tó
Chú ah, kiû lí hō͘ goán bô sit-bê; tng goán ná iûⁿ sit-lo̍h tī húi-bia̍t ê lō͘–ni̍h, kiù–goán, kā goán phāiⁿ tī lí ê keng-thâu téng; mā hō͘ goán ū hok-khì chhiⁿ-chhiūⁿ thiⁿ-sài ē tàng chōe-hé ūi-tio̍h chòe-jîn ê hoán-hóe lâi hoaⁿ-hí khoài-lo̍k. Tī Chú Iâ-so͘ ê miâ kiû, A-men.
(Ông Bí-su)
