〈何等的幸福〉

18

(請安裝Taigi Unicode字形,配合Firefox瀏覽器可閱讀)

孫少汶

我是佇教會 tōa-hàn ê 青年,自 sòe-hàn 佇教會禮拜所吟 ê 詩歌理所當然是聖詩,總是教會每禮拜吟 ê差不多 lóng 是 hit kúi 首,所以我對聖詩就無啥物 sim-se̍k ê 感覺。佇我進入神學院受造就進前,對聖詩無 siáⁿ 了解,連聖詩 koh 有分 1964 年出版 ê 舊《聖詩》,以及 2009 年出版 ê 新《聖詩》lóng 毋知,現時講起來實在是真見笑。總是進入神學院了後,才知影原來新《聖詩》內容 chiah-nī 豐富,裡底毋 kan-ta 有歐美 ê 詩歌,mā 有咱台灣本土佮原住民 ê 詩歌,而且 koh 有用 chōe chōe 國家 kap 民族 ê 旋律所創作 ê 詩歌。若是對台灣基督長老教會總會 ê 詩歌分享網站來看,會使看著詩歌 ê 簡介、作者寫作 ê 原因,以及當時 ê 時代背景等等。通 ho͘ 咱明白詩歌創作 ê 脈絡,teh 吟 ê 時就會更加體會著詩歌所 beh 傳達 ê 意思,所以新《聖詩》實在真值得逐家佇主日禮拜 ê 時 chòe-hóe 來吟。

我真意愛 ê 一首聖詩是 526 首《何等的幸福》,頭擺聽著是駱維道牧師佇台南神學院 ê 早禱分享。這首詩歌是作曲家 Pablo D. Sosa 所創作,伊佇阿根廷作牧師,總是做禮拜 ê 人 bô 講 kài chōe,特別是社會 ê 邊緣人感覺家己不配來到教會成作基督徒。所以 Pablo D. Sosa 就創作這首歌,kap 教會聖歌隊、會友佇禮拜堂外面吟 Miren que bueno, que bueno es(新《聖詩》用何等 ê 幸福,何等快樂來描述),beh 來邀請禮拜堂外面所有 ê 人,chòe-hóe 歡喜 chham-ka 教會 ê 禮拜,享受佇上主 ê 團契中。

這首詩歌 siāng khip-ín 我 ê 就是歌詞,he 是根據詩篇 133 篇中 ê 詩文來創作。講著兄弟和好相及徛起,是何等 ê 好,何等 ê 安樂,就親像貴重 ê 膏油、黑門 ê 露水,以及主上帝所定永遠 ê 活命。Chit-ê 畫面實在是真美好,súi 歌詞配合輕快活潑 ê 旋律,ho͘ 人真 kín 就會使進入佇詩歌 ê 中間,真正體會著詩所 beh 傳達 ê 感情,甚至身軀 mā 會跟隨旋律搖動。Koh 會記得當時吟這首詩歌 ê 時陣,學校眾教職員、學生 ê 面 lóng 充滿笑容,感受著佇上主疼 ê 裡面,無 koh 分你 kap 我,是真正成作一體。期待全世界無論什麼人,lóng 會使親像詩篇 kap 這首詩歌所 beh 傳達 ê 信息,就是親身體會佇上主裡面和好徛起,是何等 ê 好,何等 ê 安樂! (台南神學院神學生)

我有話要說