◎葉國基
所思念美麗ê島國啊!
是啥事hō你佇冷風中吐氣。
1947──啊!1947
台灣人悲傷ê記號
七十外冬暗眠摸ê歲月
一粒粒未死ê心肝
佇半世紀歷史中恬恬忍受。
枉屈ê冤魂
佇淡水河水門
佇高雄大港墘
親像一pha孤單ê路燈
徛佇恬靜寒冷 ê 路頭
惡夢,原來就是一kōan(串) 毋敢講出來ê故事
埋佇心頭深深ê傷跡。
幾萬个二二八英魂
親像規萬粒ê天星
佇故鄉天頂閃sih
請安息
我ê兄弟啊!
一直到日頭落山
我猶原會記得恁
青春 ê 血跡
流佇苦難故鄉ê土地。
(作者為前世界台灣同鄉會聯合會會長)