李庥 這個人kah 伊 ê 事 (下)

(請安裝Taigi Unicode字形,配合Firefox來讀)

華語原著:張瑞雄。台語翻譯:陳士彰

編按:作者張瑞雄牧師 tī 11 月 2 日安息主懷,享年 87 歲。張牧師生前致意宣教史料整理,間接促成《李庥與伊麗莎白‧李庥宣道書信集》出版。伊臨終前向望公報讀者會當透過這篇文章,認 bat 李庥這位英國宣道會第一位真正駐台 ê 牧師。

 

馬偕(偕叡理)──及伊上親近 ê 宣教師

台灣北部宣教是 1872 年對偕叡理牧師開始,tī 阿里港 kah 李庥學習兩個月了後,3 月初 7 李庥陪伊,坐海龍號輪船對打狗出發,隔日靠 tī 安平港,台灣府城 ê 德馬太醫生也陪咧同行。到 3 月初 9 下午晡三點,對淡水港上陸,是加拿大長老教會 tī 台灣設教 ê 紀念日。因為按呢,李庥與偕叡理就成為好朋友;偕叡理常常將心思 kā 李庥講。

經過 6 冬後 tī 1878 年 5 月 27 日,偕叡理牧師和五股坑 ê 張聰明 tī 淡水 ê 英國領事館結婚。這項偕牧師 ê 心內事,tī 李庥致 McGregor 報告 ê 批(1878 年 4 月 19 日)內底有寫:

我可能會互你驚一趒,聽著馬偕有意思欲及一位漢人 ê 基督徒結婚。Tī 舊年 10 月經過廈門 ê 時陣聽著這個傳說,毋 koh 實 tī 猶袂當確定這個報告 ê 真實性。伊主要 ê 理由是為著婦女宣教 ê 緣故,伊放捒個人家庭、國家 ê 成見,伊講:「透過伊家己 ê 婚姻 chhōa 人來信基督。」我有及伊參詳足久,無論外面 ê 人按怎想法,到底是啥理由致使馬偕欲娶華人做某,我是非常相信伊,照我對伊 ê 認 bat 以及伊 ê 背景來接受這個決定。因為這項代誌是關係個人 ê 犧牲及誠懇,我相信伊是遵趁主 ê 意思。(Hugh Richie. Letter Apr. 19, 1878)

巴克禮──續接李庥事工 ê 宣教師

對甘為霖來到台灣滿 3 年半,李庥來到台灣 8 年半了後,tī 1875 年 6 月初 5,巴克禮來到台灣 ê 打狗。伊是本來預定 tī 廈門學習、服務一段時間;總是因為接著福爾摩沙宣教師會甘為霖署名 ê 通知,要求趕緊到福爾摩沙。理由是,因為李庥牧師拍算 tī 明年初欲轉去英國,而且大約是今年(1875)10 月,李庥欲去福爾摩沙其他 ê 所在巡迴傳道及訪問。所以巴克禮提早 tī 1875 年 6 月 5 日來到打狗。

李庥為巴克禮 ê 台灣宣教提供根基及基礎。因為巴克禮 tī 台灣起頭 ê 6 個月是踮 tī 打狗,跟李庥學習,及伊做同工。李庥一家回國述職 ê 期間,巴克禮續接負責李庥所開拓攏總 ê 工作:巡迴教會、問道理、洗禮、聖餐、教職教育及訓練等逐項攏做。

李庥是 1876 年 1 月初 6 離開台灣回國。巴克禮是將近一年後 ê 12 月才對打狗遷徙去台灣府,總共 tī 打狗 ê 宣道站有 1 年 6 個月。

 

李庥是頭一位訪問台灣東南部 ê 宣教師

1875 年 3 月,李庥通過阿里港教會 ê 長老陪伴,坐戎克船前往後山;4 月初 3 到寶桑(台東),有卑南族頭目 ê 某來迎接,因為頭目去調解部落 ê 紛爭。初 10 來到蟳廣澳、11 到 tī 彭仔存(城山),受著從西部搬來 ê 平埔西拉雅族會友熱烈 ê 歡迎。12 是禮拜日,tī 頭人 ê 厝空地仔做早天祈禱,因為盼望得著醫療,出席 ê 人相當踴躍。李庥 tī 4 月 23 日倒轉來打狗,完成東部 ê 宣教旅行。李庥 tī 原住民部落中間有 tòa 一站時間,tī 批內底有詳細記載伊 ê 觀感,親像原住民用檳榔祈求拍獵順利 ê 風俗、丈夫死了,會埋 tī 家後 ê 眠床跤,反過來亦 siang 款;婦仁人會用幫忙查甫人農事,來表達對伊 ê 戀慕、結婚 ê 禮俗等等。
李庥夫婦對台灣婦女教育 ê 重視

1879 年 9 月 13 日,李庥有寫:「……除了這間神學校,阮盼望 siang 時開設一間女子寄宿學校互 24 位學生……。」李庥不幸 tī 兩禮拜後過身,後來婦仁人伊麗莎白‧李庥成做長老教會 tī 台灣 ê 第一位女宣教師。雖然本批信收集到遮結束,總是「女學」並無斷去。

伊麗莎白繼續 tī 府城盡力 tī 女學 ê 事工,1880 年 2 月,她受母會女宣道會(The Women’s Missionary Association)選做第一任女宣教師(Lady Missionary),一直到 1884 年 6 月 13 日因為破病回國。

任內,她除了傳道工作,閣盡力籌備設立女學(Girl’s School);後來女學果然 tī 1887 年 2 月 14 日開學。長老教女學(今長榮女子中學) ê 成立,就是李庥牧師夫婦願望 ê 實現。

 

巴克禮對李庥 ê 客觀評估及教勢內容調整

Tī 李庥回國期間,巴克禮續接李庥工作起頭 ê 時,寫批向英格蘭本部報告,其中有一張報告內容如下:

1.現此時 tī 台灣南部總共有 26 個傳教站,其中有一站 teh 欲互甘為霖牧師關起來。

2.傳教 ê 統計數字如下:今年教會並無大變化,無開新 ê 福音站也無任命新 ê 傳教者,有收一名新學生名叫做「春」,辦事人員損失袂少。一名傳教師撤職,兩名長老過身,另外兩名長老及兩名執事免職。

3.李庥牧師離開了後,我探訪福音站,總是無執行聖禮。了後我重新開始,探訪福音站,問道理,準備洗禮,舉行聖餐。這擺只有接受一位受洗。

4.有一個「舊社」ê 福音站關門。這個站人數真少,差不多是 10 人以下,當我去執行聖禮典 ê 時,10 個人中間只有 4 個人出席,所以需要關門。假使另外 6 個人出席,in 也會受取消資格,有人給我講 in 來教會 ê 目的是欲得著外國 ê 幫助,幫助 in 世事 ê 困境。總是受拒絕了後,in 又 koh 倒轉去 in ê 世俗事,遮對牧者來講是足遺憾 ê 代誌,所以我決定關門。

5.另外一項有必要提起 ê 代誌,就是關係地方 ê 學校。當李庥先生離開 ê 時,有開兩間學校,當伊離開了後,接近農曆年底,另外一個福音站 ê 一位傳教師要求我設立一間學校。這項代誌我毋是真清楚,總是看著人無有受教育 ê 機會,就互我連邊會當接受,一個月付互老師 $3 教 10 個學生,遮是傳教師會 ê 安排。然後,另外一個教會傳教師講,別間教會有學校,阮總袂使無學校。因為我是新手,他一直說服我,我就答應。不過我互 in 知影是實驗性質,假使所開 ê 經費,袂當保持學生 ê 出席率,就會學校將關起來。全部一睏開設 5 間新學校,目前總共有 7 間,遮是一個好 ê 主意,免得將囡仔送去會外 ê 學校讀冊,受著世俗 ê 影響及拜偶像。常常有世俗 ê 父母因為囡仔來基督教學校,有機會接觸基督 ê 信仰。假使阮有濟濟基督徒 ê 老師及可靠 ê 工作人員,來及學生 ê 父母交陪,論到基督教 ê 教育。假使阮有充分 ê 時間來指導,遮是真好 ê 計畫。總是此款理想並無達成,事後,我發覺必須要關 4 間學校。所以,現此時只有賰 3 間學校,教會一個月只有付一半薪資 $3。(巴克禮給馬奇遜報告 ê 書信:打狗,福爾摩沙,1876 年 12 月 25 日)

過 8 個月了後,巴克禮閣有一張報告提起伊及李庥 tī 宣教方式上有相當 ê 差別。他寫講:

我頂一張批有提起 tī 某種情形之下,對我來講好親像咧指示李庥先生,應該及阮 tòa tī 台灣府。批內底我並無指出 ê 是,如果領事干涉有確實 ê 迫害問題;關係此項,應該要有團結一致 ê 行動。我恐驚代誌並毋是按呢,如果李庥牧師留 tī 打狗。我知影 18 個月前遮只是為著援助 ê 申請。當時我有安排七八個相及鬥陣。現在根據 in 家己 ê 做證,遐並無有迫害,一切攏是平靜。我相信這種情況並毋是對 tī 任何明顯 ê 變化,看袂出 in 支持伊 ê 方式。總是我咧想,伊有必要料理家己 ê 權力,毋免等待來諮詢阮。伊 tī 打狗主要 ê 工作是:交友,諮詢,並監察遮個福音站。如果伊得著及我仝款信息,伊會按怎做。有一擺,如果我無干涉「就會有群眾流血 ê 事件」?這件事 ê 真相照我看,阮應該要統一行動,對教會及世界和平,及到 tī 附近徛家是有必要統一 ê 行動。咱無必要考慮打狗鐵路 tī 阮 ê 計畫裡,到底有啥款 ê 利害關係無?這幾張批所提起 ê 任何代誌,我攏願意承擔。Siāng 時也無應該互李庥先生看著。(巴克禮書信:台灣府,福爾摩沙,1877 年 8 月 9 日)

李庥全家轉來台灣了後,台灣府城與打狗兩個宣教站,照巴克禮與台南教士會 ê 建議,聯合做一個宣教中心設踮台灣府城。

1879 年 9 月 29 日李庥過身 tī 台灣府。享年 39 歲,其中 tī 台灣事奉 12 冬,伊 ê 工作範圍從台南、高雄、屏東、小琉球,不里有成果。

 

李庥 tī 台灣宣教上 ê 貢獻及地位

若是講著李庥就想著屏東;抑是看著屏東中會 ê 教會,就想著創設教會 ê 源頭,就是李庥。李庥是英國長老教會差派來台灣頭一位牧職宣教師。咱 thang 想像,當時 ê 屏東一帶,攏無人聽過耶穌及基督教,及拯救罪人 ê 福音。清國統治 ê 時代,當時 ê 高雄市及屏東縣攏是埤頭(鳳山縣知)所轄管 ê。雖然埤頭 ê 會所及高長傳道,是 tī 李庥袂來進前,由馬雅各醫生所設立。李庥對 1868 到 1876 年 1 月回國休假。伊工作 8 年中間,(從1871年年底得甘為霖牧師 ê 幫助),總共設立 26 間 ê 會所(巴克禮寫回海宣幹事 1876 年 12 月 25 日 ê 書信)。布教 ê 成果通講是非常輝煌。從會所 ê 間數及信徒 ê 數額其實袂得看出心靈上 ê 效果,要緊是 tio̍h 看內心,是毋是有找著「家己」。(全文完)

我有話要說