◎李南衡
身為一個老人，認為台灣對老人ê照顧算是誠（chiâⁿ）有誠意。Tī台北市每個月有老人年金3500箍、坐公車60擺免錢、坐捷運抑是去中南部坐高鐵、抑是坐飛機攏是半票，每年重陽敬老金1000箍，猶koh有1年1擺免費ê「老人健康檢查」。上70才第一遍去享受「老人健檢」，當然tio̍h檢查三高：高血壓、高血油、高血糖。查埔人tio̍h koh特別檢查一項攝護腺，第一遍作實在真bē爽：倒落去內褲褪掉，醫生戴手套指頭仔伸入去尻川內底摸過來摸過去了後，講：「你ê攝護腺有小可腫大，需要去hō͘泌尿科醫師檢查追蹤。」我完全無攝護腺ê知識，只好應講：「哦！」檢查醫生koh問：「你一暗起來放幾遍尿？」「免起來，我攏是睏直達ê，一睏到天光。」醫生soah講：「按呢，你攝護腺無啥問題。誠好。」
醫生連鞭講我攝護腺有問題，連鞭koh講無問題，害我霧煞煞。攝護腺到底是啥？我轉來厝裡趕緊google一下chhōe有關攝護腺ê資料。哦，原來攝護腺是查埔人專有ê、生tī下身，嬰仔ê時一粒那豆仔，青少年ê時一粒那櫻桃，3、40歲ê時一粒那乒乓（phîn-phóng）、重量約20公克，5、60歲ê時一粒那雞卵，70歲ê時一粒那桃仔（當然，桃仔mā有大細粒）。按呢我tio̍h知影：年紀愈大攝護腺就會愈大，大kah會壓迫尿道，所以人到4、50歲就會開始感覺放尿無早前hiah順、mā那像愈來愈細káng koh放bē遠，那像台灣俗語話講ê「囡仔放尿soān過溪，老人放尿滴tio̍h鞋。」會捷捷（chia̍p-chia̍p）想beh放尿、見放放一屑屑仔、koh放bē真清氣。
Che才hō͘我想起「上卌就bē攝。」（chiūⁿ siap chiū bē liap.）chit句台灣俗語話。「卌」（siap）是「四十」（sì-cha̍p）ê合音詞，像「四十五」原本讀作“sì-cha̍p-gō͘”，合音詞「卌五」讀作“siap-gō͘”。「攝」有一個意思是：收縮自如。原本「攝」是講放屎ê時尻川ê收縮，延伸ê意思是講：人40歲以後身體狀況就慢慢落崎。
現代社會工作時數kah做粗重ê工課攏有減少，食物加真富裕營養，環境衛生改進，流行病減少，醫療kah醫藥進步等等，雖然年歲上卌，猶原是一尾活龍。特別是chit幾十年，台灣平均壽命提懸，照台灣衛生署資料：2010年查埔人平均壽命76.2歲，查某82.7歲，40歲猶算少年，除了身體健康以外，知識已經充實好勢，做代誌ê經驗mā相當豐富，會使講「上卌是上卌，猶koh真gâu攝咧！」事業才開始beh大拚，咱看總統副總統候選人ê年齡條件，年滿40才有資格。若真正「上卌就bē攝。」in當選總統了後，beh按怎攝理國家大事咧！
相信免偌久，無人會koh講「上卌就bē攝。」（chiūⁿ siap chiū bē liap.）chit句台灣俗語語。
